港聞

【Emily Online】立法會內答非所問被批「發夢」 劉怡翔:當時正處理口罩緊急事宜 (14:45)

立法會今日(19日)就新型冠狀病毒肺炎事宜進行緊急質詢,唔少議員關注口罩事宜,唔知係咪因為咁,搞到財經事務及庫務局長劉怡翔明明被問上市公司事宜,都錯誤答咗採購口罩,仲要請議員重複問題,被批評「發緊夢」。

金融服務界議員張華峰提問,問到受疫情影響,上市公司年報可否押後公布,劉怡翔就答咗口罩供應事宜,畀立法會主席梁君彥提醒後,佢竟然請張華峰重複問題,引起在座議員嘩然。張華峰似乎有啲嬲,就話自己已經問咗問題,係有關上市公司年報事宜;唔少議員為此起哄。

其後有議員批評劉怡翔,民主黨林卓廷就話劉怡翔月入30幾萬,竟然公然喺議事堂發夢。

劉怡翔其後回應林卓廷質詢時,終於可以講到口罩供應事宜,話有喺全球五大洲,包括非洲、南美洲採購,但因為船期、航班有所減少,試過訂咗後有七成口罩嚟唔到香港。

劉怡翔離開立法會時被記者追問係咪發夢,佢話當時處理緊有關口罩嘅緊急事宜。

財庫局新聞秘書回覆話,局長當時太專注以手機處理公務,包括口罩事宜;「非常抱歉沒有留心議員的提問,以後必定會多加注意」。

其他報道:【武漢肺炎】鑽石公主號53港人確診 約20港人檢測陰性料今日可下船

其他報道:涉用雷射筆照警車藏噴漆 20歲男學生被控3罪准保釋

相關字詞﹕劉怡翔 財庫局 張華峰 上市公司 口罩 發夢 編輯推介

上 / 下一篇新聞