港聞

【Emily Online】網民仿「潮文」創作政府高層「激烈打鬥」 政務司長辦公室認真回應:完全捏造,非常無聊 (23:09)

律政司長鄭若驊早前喺英國倫敦被示威者包圍期間仆倒,佢噚日(20日)話自己隻手甩骹又骨折,最少3個月至1年唔能夠正常活動,都幾陰公。今日(21)有網民喺連登討論區發表一篇文章,聲稱政務司長張建宗「接受國際媒體訪問」時透露,政府高層包括特首林鄭月娥同鄭若驊等,曾「發生激烈打鬥」。政務司長辦公室今晚就喺facebook澄清,有關文章內容「完全捏造,非常無聊」。

Emily喺連登創意台睇到呢篇名為《[江湖傳聞] 政府高層發生激烈打鬥》嘅文章,見佢提到張建宗「受訪」時話,自己作為政務司長,本應為作為政府第二把交椅呢個榮譽感到高興,但佢「從來沒有享受過這樣的待遇,因為「政府有太多蠢人」;又話行政會議成員有矛盾時,「開始我還試着去阻止,後來他們直接叫我閉嘴,我根本感覺不到自己就是司長」。

連登文章又聲稱,張建宗話喺「中大攻防戰」中,時任警務處副處長鄧炳強曾用水樽掟速龍警員,之後「至少有10人群毆了鄧炳強」;後來「鄧炳強的辦公室多了一根榮譽警棍」,相信係用嚟防身。文章仲話,林鄭月娥喺美國參議院通過《香港人權與民主法案》後被鄭若驊諷刺,結果就搵咗支木棍返嚟「亂棍爆打」鄭若驊,鄧炳強就在旁叫林太「用力打,往死裏給我打」,結果鄭若驊就被打到甩骹。

文章下面有人留言話「唔好以為那左d(改咗啲)字眼我就認唔出呢篇潮文」,Emily睇到都一頭霧水,好彩有好同事埋嚟解困,話我知原來呢篇文章,其實係改篇自一篇名為「荷蘭三棍客」嘅網絡潮文。好同事仲畀埋荷蘭三棍客潮文嘅link畀Emily睇,咦,行文又真係一模一樣喎。

政務司長辦公室今晚就喺fb出post,話「今日有網上傳聞引述司長話政府高層發生打鬥,有關內容完全揑造,非常無聊」。呢個post都引嚟網民熱烈回應,話連登篇文「都唔及E(𠵱)個回應咁X好笑」;又有人問fb admin係咪未睇過原本嗰篇潮文,「潮文都唔識……仲話要多d(啲)了解年青人」,「真心咗啦」。仲有網民質疑,「五大訴求又唔見你應得咁快」,又話「CCTV都無,點証(證)明無高層打鬥」。Emily就覺得,網上傳聞嘅嘢都係要fact check咗先,既然政務司長辦公室都澄清咗,就無謂再繼續傳啲謠言喇。

相關報道:鄭若驊手腕骨折 籲鄭文傑向內地相關部門報案

相關報道:劉曉明慰問鄭若驊 盼國際社會認清香港事態

相關字詞﹕連登 創意台 潮文 張建宗 鄭若驊 林鄭月娥 鄧炳強 政務司長辦公室 謠言 澄清 編輯推介

上 / 下一篇新聞