港聞

【Emily Online】人民網香港fb配圖:鄧炳強「止暴製亂」 網民:食咗誠實豆沙包 (20:21)

11月2日港島多處爆發衝突,內地《人民日報》旗下人民網(香港)嘅facebook,今日(5日)傍晚上載一張圖片,話「未來一哥」、警務處副處長鄧炳強當日喺港島,親自「落場平暴」,但帖文嘅配圖就話鄧炳強係「全力以赴 止暴製亂」。

「止暴制亂」係港府近期常用嘅言辭,但「止暴製亂」?有網民喺fb帖文留言,話人民網「食左(咗)誠實豆沙包」,又話好認同「警察全力以赴製亂」呢個講法。

帖文嘅文字版其實係寫住「#全力以赴 止暴制亂」嘅,有網民就指出,配圖寫咗「止暴製亂」可能係簡體字轉成繁體字時出錯,因為「製」同「制」嘅簡體字都一樣係寫成「制」,所以又有網民認為,今次人民網話鄧炳強「止暴製亂」,突顯咗學習繁體字嘅重要喇。

人民網(香港)fb嘅帖文係喺傍晚6點04分上載,記者到夜晚8點再睇,帖文同嗰張話鄧炳強「止暴製亂」嘅配圖都仲喺度。不過,去到8點14分,個帖文已經被「下架」。

11月2日,逾百民主派區議會選舉候選人喺維園舉行「選舉聚會」,警方衝入維園施放催淚彈驅散人群,原本獲得不反對通知書、喺中環遮打花園同愛丁堡廣場舉行嘅兩個集會,就被警方下令腰斬。

逃犯條例 相關報道:

消息:墮樓科大生疑現腦幹死亡迹象 林鄭表深切慰問

催淚彈下墮樓 科大生腦重創命危 疑將軍澳停車場3樓墮2樓 消防稱無人阻救援

兩男涉將軍澳襲警今提堂 裁判官質疑控罪書警身分匿名

【禁蒙面法】的士深水埗撞人群案 女教師被控3罪准保釋明年再訊

涉咬甩趙家賢耳 退休漢控傷人等3罪 留院押後至周五訊

相關字詞﹕逃犯條例 反修例 遊行 示威 集會 五大訴求 警民衝突 警察 鄧炳強 止暴制亂 止暴製亂 人民日報 人民網 編輯推介

上 / 下一篇新聞