港聞

【Emily Online.短片】開會被質疑瞓覺 黃定光:我瞓唔瞓都唔會阻礙會議進行 (18:45)

立法會新一屆會期噚日(16日)開始,人力事務委員會今日(17日)開會要選正副主席。公民黨議員郭家麒提名民建聯議員黃定光做主席嗰陣,話黃定光「瞓緊覺」,搞到黃定光嬲嬲豬發晒脾氣,糾纏間仲同主持會議嘅最資深議員梁耀忠講,自己瞓覺與否「都唔會阻礙會議進行㗎嘛,咁即係我可以瞓啦?」

事源郭家麒想提名黃定光選委員會主席時,提及黃定光「瞓緊覺,我唔知佢得唔得」;黃定光聞言即刻話郭「黐線」同埋「懵到上心口」,梁耀忠因此叫黃定光尊重會議,話佢可以唔同意郭家麒說法,但唔好用「黐線」話同事。

郭家麒聽到黃定光嘅回應,就話「唔好意思,原來佢唔係瞓緊覺」,「因為你知黃議員佢常態係睡眠嘅,咁我見佢耷低頭,我錯誤認為佢係瞓覺,下次佢應該棟個牌喺度,寫住『我不是睡眠』」;又叫梁耀忠裁決黃定光話佢「黐線」係冒犯。

郭家麒同黃定光拗咗一輪,與黃同屬民建聯嘅議員蔣麗芸就建議,不如佢哋兩個一筆勾銷算啦,獲梁耀忠同意,叫大家唔好再針對個別議員喺自己座位嘅行為。但黃定光又再話,自己瞓覺「唔會阻礙會議進行㗎嘛,咁即係我可以瞓啦?」梁耀忠再答佢,總之唔影響會議就唔會阻止對方做任何事。

後來有其他議員加入戰團,提出不同規程問題,其間郭家麒要求秘書處職員澄清,會議紀錄並非逐字記錄,點樣令公眾明白「民建聯黃定光議員講說話嘅低劣情況」。但「低劣」呢個詞語又引起幾個民建聯議員不滿,再要求梁耀忠裁決。爭拗期間黃定光又再「澄清」,自己係話郭家麒「佢睇唔到我,佢唔係傻咗咩?」、「隻眼黐埋吖嘛」、「話你哋『黐黐地』係『癡情』個『癡』」等等。

成件事持續咗近20分鐘,最終梁耀忠話會議時間唔夠,要留返下次會議再裁決,就結束咗今次會議,結果都係未能選出委員會正副主席。

人力事務委員會會議片段(6:38開始郭家麒提名黃定光選主席)

相關字詞﹕立法會 人力事務委員會 郭家麒 黃定光 梁耀忠 蔣麗芸 民建聯 編輯推介

上 / 下一篇新聞