反修例風波下，唔少網民近日不滿港鐵，發起「跳閘」行動，話唔想畀港鐵賺錢。Emily今日路過中大，喺文化廣場見到有部1比1嘅木製入閘機！唔少同學圍住部機熱烈討論，仲有同學即場「試用」𠻹。
原來入閘機係有同學自發製作，並將製作剪輯成影片。片段中同學提到自己好鍾意呢啲入閘機，又見到特首林鄭月娥咁關心入閘機受損，所以決定整番一部，強調完全唔鼓勵任何人做犯法嘢啊！呢位同學大約花咗16個鐘製成入閘機，話呢部機好安全，例如入閘位用咗海綿棒整成，即使撞到都唔怕受傷。入閘機亦有部iPad mini，話會放播放一啲港鐵點近日嘅片段等等喎；大家亦可以喺機身貼memo紙，寫低心聲。
呢位同學同Emily講，其他朋友仔都有幫手一齊整。佢話，呢部入閘機係一件藝術品，最主要係希望喚起大家多啲關注近日係港鐵發生嘅事啊。
另外，中大大學站旁嘅民主女神背部就被人塗污咗，中大法律反送中關注組對此強烈譴責，亦呼籲同學聽朝（周五）一齊幫手清潔民女，話要喺八月十五還民女一個乾淨嘅八月十五喎。