港聞

【Emily Online】任何仁中秋前教處理蠟燙傷 網民留言促交代8.31真相 (19:00)

今個禮拜五(13日)就係中秋節,唔少人可能都會玩下燈籠應節。消防處嘅任何仁今日(11日)就趁中秋前夕喺facebook出post,教大家處理蠟燙傷嘅應急方法。

任何仁話,中秋節可以「玩燈籠點蠟燭添氣氛」,但「任何人唔好煲蠟」;又話如果意外畀熔咗嘅蠟滴到皮膚會「好痛㗎」,如果唔小心因此被蠟燙傷,首先要用清水持續沖洗燙傷部位去降溫同減輕痛楚,同時冷卻熔蠟;之後就要用保鮮紙或者乾淨嘅紗布包住患處,以免細菌感染。佢仲提醒,千祈唔好夾硬撕走黏喺皮膚上嘅熔蠟,因為咁樣好易扯傷皮膚,增加受感染嘅風險。

任何仁個post出咗兩個鐘左右,已經獲得超過200個留言,不過對比畀蠟燙傷要點處理,大部分留言嘅網民似乎都更想知另一件事——唔少人留言話「希望見到831真相」、問「831單嘢點先?」,亦有人提及今日立法會議員毛孟靜有關8.31港鐵太子站消防及救護行動的記者會,希望消防處回應。

相關報道:【逃犯條例.831】毛孟靜引述消防內部紀錄:警稱太子站月台無傷者拒救護入站 消防同時接10傷者報告

其他報道:哈囉喂鬼屋奪命案 演員稱事主無理會被嚇:好似知自己要去咩地方

相關字詞﹕消防處 任何仁 蠟燭 燙傷 蠟燙傷 中秋節 燈籠 蠟燭 逃犯條例 831太子站 港鐵 太子站 編輯推介

上 / 下一篇新聞