港聞

【區議會選舉.Emily Online】徐逸昇唔選北區「盛福」免攬炒 (23:51)

反修例風波促使唔少民主派、素人積極考慮出戰11月區議會選舉,出現「撞區」情况,例如北區「盛福」選區。曾為「反自動當選運動」(反自動)成員嘅警總餐廳前經理徐逸昇(Ricky)原本積極考慮挑戰盛福,但新民主同盟(新同盟)黃良喜、社工呂智恆都喺嗰區落腳。Ricky同Emily講,今晚(9日)同呂智恆見面後決定退出,因為黃同呂都唔肯讓,佢唔想「攬炒」。

Ricky早前響應由人民力量前成員、黃大仙區議員譚香文發起嘅「反自動」,但喺多個選區「撞區」,引起爭拗。Ricky近日亦退出「反自動」,佢今日形容自己被「用完即棄」,「反自動」一直話會同新同盟協調,但毫無進展,要佢自己去協調。Ricky話,佢住嘅地方喺「華明」選區,黃良喜做過嗰區區議員,覺得黃唔做嘢,所以佢先堅持喺盛福出選;退出後會支持呂智恆出選。

黃良喜就同Emily講,認為自己勝算較高,加上喺「盛福」長期工作,如果突然離去居民會覺得背棄期望,所以不會讓,搞初選亦無意思。呂智恆就話,佢一早喺嗰區搞「連儂牆」,又話黃良喜出現率低,而新同盟一方無意協調,佢都唔會讓。

相關報道:

民主動力趙家賢:「反自動」要選已經有人嘅區  譚香文:落區名單一早畀佢

區選撞區 歐頌賢拒退出 港大前副學生會長任嘉兒停選舉工程

相關字詞﹕區議會選舉 反自動當選運動 徐逸昇 區議會 北區 盛福 新民主同盟 黃良喜 呂智恆 編輯推介

上 / 下一篇新聞