港聞

【Emily Online】區選撞區 歐頌賢拒退出 港大前副學生會長任嘉兒停選舉工程 (21:00)

區議會選舉將於年底舉行,一場反修訂《逃犯條例》風波,令唔少素人都有意出戰,為社區盡一分力。不過素人太踴躍就演變成「撞區」。喺「大學」選區,本身係註冊護士、曾任港大學生會內務副會長嘅任嘉兒,以及原本經「反自動當選運動」、任職機械工程師嘅歐頌賢都考慮參戰,不過雙方噚晚(5日)進行會面協調後,任嘉兒就話雙方一直未能達成共識,宣布停止相關工程。

任嘉兒噚日喺facebook表示,唯有停止一切內耗,先有機會成功擊跨高牆,佢強調心願好簡單,希望兄弟爬山、光復議會,「如果兩個人都堅持繼續留低,贏的機會是零」,佢宣布即時停止一切相關工程,又寄語歐頌賢11月一定要贏。

任嘉兒嘅決定引起唔少網民反彈,形容佢係「被逼走」,東區區議員鄭達鴻更留言話佢嘅努力全部人有目共睹,請佢重新考慮、香港眾志秘書長黃之鋒亦留言叫佢繼續服務大學區。

「反自動當選運動」其後回應,透露歐頌賢報名考慮參選後,發現任嘉兒已出戰大學區,認為任嘉兒較適合;仲話曾經勸喻歐頌賢退選、讓位予任嘉兒,但歐頌賢拒絕建議,後來自行搵許智峯協調,強調期間「反自動當選運動」冇任何代表出席會議。「反自動當選運動」認為歐頌賢處理手法失當,有違平台原意,亦違反支持年輕人優先想法,無法繼續支持佢出選,又話希望任嘉兒可以重新考慮參選決定,對引起混亂深表歉意。

歐頌賢就喺fb話同任嘉兒傾得好愉快,曾經討論以初選、提名者多寡去作決定,但一致同意過於費時,佢話欣賞任嘉兒勇敢,亦尊重其決定,「放棄積極參選需要很大勇氣;留下來的亦需要很大勇氣」。

歐頌賢同Emily講,其實協調好順暢,因為任嘉兒剛辭工,仲喺通知期內;而佢自己較多時間落區,所以任嘉兒願意讓畀佢,強調自己唔係蝦佢。對於會唔會考慮轉去其他白區,歐頌賢話佢同任嘉兒都熱愛港島,其他港島選區都滿晒,兩人喺區內都做咗工作,唔想掉低街坊;至於會唔會再協調,佢就話大家都係成年人,希望網民、居民都尊重佢哋決定,相信市民有智慧。

港島區立法會議員區諾軒向Emily形容任嘉兒「好偉大」,因為眼見歐頌賢唔會走,雙方幾次協調都未能就初選機制達成共識,任嘉兒認為繼續落去會「攬炒」,未能戰勝建制派,點解唔喺呢幾個月教更多人急救,唯有放手唔再喺當區工作。

民主黨許智峯噚日曾參加協調會議,佢就話的確較早支持任嘉兒出選,後來歐頌賢落區,佢向兩人提出見面協調。佢形容任嘉兒喺噚晚協調會中顧全大局、提出退讓,以促成當區只得一名民主派參選,會尊重佢嘅決定。許智峯又話反自動當選運動令多區「撞區」,未能達到「填空白」效果,相當唔理想,應該檢討。

民主動力召集人趙家賢稱,歐頌賢落區前,任嘉兒已喺民主動力協調名單內。佢又話有組織多次與民主派人士撞區,相信民主派選民眼睛雪亮。

其他報道:17人涉2016年立會IT界賄選種票 的總成員准保釋押後區院再訊

其他報道:UGL事件不起訴梁振英 郭卓堅曾健成被拒司法覆核許可

相關字詞﹕區議會 選舉 大學 任嘉兒 反自動當選運動 歐頌賢

上 / 下一篇新聞