港聞

【Emily Online】觀塘曉麗撞區 民主派協調未果 (23:14)

民主派有意於11月區議會選舉搶灘,政治素人、地區組織或政黨都紛紛派人出選,唔想畀建制派咁易贏。喺觀塘曉麗選區,就出現「曉麗新動力」張敏峯同「反自動當選運動」成員、黃大仙區議員譚香文助理張隆撞區情況。張敏峯本周初喺facebook話同張隆達成共識,下周日(25日)開居民大會做初選,但今日(20日)「反自動當選運動」喺fb話對初選建議有保留、未有共識,唔少居民亦有保留。

當區現任議員係九龍社團聯會蘇麗珍。「反自動當選運動」話擔心初選倉卒,民主派支持者難以出席,建制派會動員居民「搞局」;仲有就係收到居民反映,憂慮投票時要畀身分證、住址等,驚私隱外泄,認為需要暫停有關大會,重新協商合適機制。佢哋又話已邀請張敏峯盡早協商,共同解決漏洞,若張敏峯本周未能安排時間會面,佢哋樂意繼續「兄弟爬山」,直至協商到居民接受初選方案為止。

張敏峯就話,早前係張隆一方提出用初選衡量邊個係合適人選,有其他議員在場見證;佢呢個星期唔得閒傾協調,係因為有份正職,仍然希望居民用腳去揀出民主派代表。

其他報道:71學生獲頒卓越獎學金 新學年起成常設政策

其他報道:瑞銀前副董事收賄入獄遭充公146萬賄款 半年內未繳清需加監30月

其他報道:42歲婦染麻疹 子女曾發燒出疹

相關字詞﹕民主派 區議會選舉 觀塘曉麗選區 張敏峯 張隆 撞區 編輯推介

上 / 下一篇新聞