港聞

【逃犯條例.Emilly Online】兩間警署兩種態度 證現場溝通「無特定規範」 (22:34)

反修訂《逃犯條例》風波持續,噚晚(14日)有市民包圍深水埗警署,警署裏面有警員一度以揚聲器叫現場人士「收啦」,又話佢哋「知道自己做嘅嘢同黑社會無分別啦嘛」,深水埗警區指揮官何啟軒今日(15日)喺記者會回應話,警方喺公眾活動中,一向會以不同方式同現場人士溝通,呢啲溝通「無特定規範」點做,係要因應現場情況,包括群眾嘅類型、反應同合作程度,去決定以「合適同可理解嘅語言」溝通。

今日亦有網民上載早前馬鞍山警署警員嘅「現場溝通」片段,就證明咗何sir口中溝通「無特定規範」嘅講法——相對於深水埗警員近乎與示威者對罵嘅「溝通」方式,馬鞍山阿sir就決定以猶如資深傳媒人陳志雲嘅磁性聲線,勸喻示威者離開。

從片段聽到,馬鞍山警署呢位阿sir指出,示威者要為包圍警署等行為負上相關刑責,包括入獄,叫佢哋「睇睇自自己手機加入咗嘅群組,嚟緊呢5年你係咪真係想同呢啲人失去聯絡?」又話如果示威者有參與過非法集結、刑事毁壞以至暴動,可能要面對長達25年監禁:「我哋數返25年前,1994年當時別說4G、5G,3G都未有,互聯網亦都未流行,25年後是一個咩世界?你就係願意為咗今晚嘅一個強出頭,而失去嚟緊25年嘅光陰嗎?我問下你,我問下你。」

馬鞍山阿sir仲話擔心「坐喺平台嘅朋友們」位置唔安全,希望佢哋「落返嚟坐喺安全位置」、更理想就係返屋企,「因為我哋都擔心你嘅安全」;又同喺馬鞍山路集結嘅人講,「立即離開係最佳嘅選擇」,因為當日已有過百個各區示威同「暴動」嘅人被捕,「你想唔想你係下一位?」叫大家唔好以為現場人多就無事,因為大家見到防暴警察到場、爭先恐後逃跑時,「你估隔離個人士仲會唔會記得你?」再次呼籲示威者即刻離開。

深水埗警區指揮官何sir喺記者會話,每次警方喺公眾活動與參加者「現場溝通」之後,都會檢視番溝通內容同表達方式。今次深水埗警署同馬鞍山警署嘅廣播都引起網民熱議,唔知警方「賽後檢討」時,又會唔會用兩間警署警員嘅表現做個對比呢?

馬鞍山警署「現場溝通」片段

逃犯條例 相關報道:

深水埗警開咪叫「收啦」 指揮官:用可理解語言溝通

警:6‧9至昨日748人被捕 否認遭汽油彈襲擊警員屬跌傷

稱示威者「have no stake」屬「誤會」 林鄭:香港你我都有份

中國駐英大使劉曉明:港情況倘再惡化 中央不會坐視

倘港府無法控制危及國家安全動亂 基本法委員:人大可頒緊急狀態令

8.11警葵芳站太古站用催淚氣 港鐵:已加強抽風「深層清潔」

警禁民陣8.18遊行 准維園集會

香港再登《時代雜誌》封面:傾全力保衛香港靈魂的戰役

相關字詞﹕逃犯條例 香港逃犯條例 移交逃犯 修訂 影響 諮詢 台灣 引渡條例 協定 商界 修訂逃犯條例 移交逃犯內地 中港移交逃犯 立法會 香港引渡協議國家 保安局 遊行 反修例 反修例遊行 示威 林鄭 林鄭月娥 政府 警察 深水埗警署 馬鞍山警署 現場溝通 編輯推介

上 / 下一篇新聞