港聞

【Emily Online】有咩勸勉話想同年輕人講?曾俊華:大家努力啦 (17:35)

前財政司長曾俊華今日(21日)喺灣仔書展出席新書《重劍2.5》嘅發布會,新書其中一個重點係「面對挫折,走向成功」。會唔會將呢本書推薦畀最近施政備受爭議嘅特首林鄭月娥?曾俊華話想推薦畀全港市民,但本書比較技術性,無5至7年劍擊經驗都唔會睇得明,又話「我覺得佢(特首)對劍擊無興趣」。至於近日嘅政治爭議,曾俊華對Emily所有有關政府施政問題都唔肯答,話關於政府嘅事就問番政府,「我遠離政治好遠啦」。

曾俊華6月12號夜晚喺facebook上載短片,呼籲大家唔好畀傷心同害怕嘅情緒埋沒理智,唔好做出傷害香港、自己同身邊人嘅決定。事隔一個月,有市民喺各區自發舉行唔同示威活動,曾俊華話現時想法同當時一樣,又話好多時都會見到連儂牆,成日喺金鐘都會經過。咁有無駐足觀看?佢就話自己做過咩都唔會講。至於有咩勸勉說話想對年輕人講,佢就話「大家努力啦」。

今次呢本新書,曾俊華話自己唔係作者,只係負責將技術同原著作者睇法嘅翻譯修訂,話希望讀者可以理解到自己舊時教練所講,喺比賽中弱者係可以靠策略,將強者最優勢嘅水平拉到同自己一樣。

相關字詞﹕曾俊華 編輯推介

上 / 下一篇新聞