港聞

【Emily Online】屯門區會升降機遮開會層數 區議員嘲政府「驚到有病」 (22:25)

屯門區議會今日(9日)開會,民主派議員會前喺場外抗議,不滿主席梁健文早前拒絕佢哋提出反對《逃犯條例》修例有關議程,至於會上議員就商討屯門公園賣唱問題。工黨譚駿賢今日喺facebook貼圖,顯示開會大樓嘅升降機內3樓按鍵被貼紙遮蓋,而3樓就係開會地點,佢形容「成個政府好似驚到有病咁,以為咁樣人哋就唔識去3樓」,質疑政府擔心有人衝擊。

本報攝影記者亦影到升降機3樓按鍵被白紙遮蓋嘅相片。屯門民政事務處回覆Emily查詢,話由於網上有人號召喺會議前夕同開會期間到屯門政府合署、亦即係開會大樓請願,因此管理處加強保安措施;3樓除咗有區議會會議室,亦有其他政府部門嘅辦事處,因應可能有較多市民前往3樓,管理處安排保安員操控升降機,會議期間市民仍可以搭升降機前往3樓。

處方解釋,管理處喺升降機3樓按鍵貼上貼紙,主要係應付3樓發生突發情况時,可以避免相關部門職員同市民前往3樓,唔係防止公眾人士接近區議會會議場地,強調區議會今朝按照一貫安排,開放畀公眾人士進入會議室旁聽。

有網民就留言,形容遮蔽升降機按鍵做法好「低B」,亦有人話,「鎖埋樓梯防煙咪畀人行上行落啦笨!」

其他報道:七旬翁旺角遭搭訕失5.5萬元財物 3人被捕

其他報道:女子婚外情疑遭強姦 被質疑憂女兒叫爸爸揭姦情 事主:佢見垃圾桶都叫爸爸

相關字詞﹕屯門區議會 區議會 逃犯條例 屯門公園 賣唱 工黨 譚駿賢 升降機 編輯推介

上 / 下一篇新聞