港聞

【Emily Online.短片】高聲反駁「建制聽令中聯辦論」遭李慧琼叫停 蔣麗芸:你唔好叫我個名! (15:08)

立法會今日(27日)繼續討論由經民聯張華峰提出、喺《逃犯條例》修例風波後恢復社會和平嘅休會動議,專業議政葉建源發言時,批評中聯辦一聲令下建制派就全部歸位,民建聯蔣麗芸(Ann姐)突然起身激動反駁。同屬民建聯嘅代主席李慧琼(Starry)叫Ann姐個名,希望佢停止發言,但換嚟Ann姐憤怒指住Starry鬧:「你唔好叫我個名!」佢仲一手撥開走過嚟勸交嘅工聯會麥美娟。

其他報道:八旬翁涉特首辦外噴「鄭月娥包庇凶犯」 保釋待索精神科報告8月再訊

葉建源發言嗰陣,形容市民不再信任議會,因為議會未能做到有效平衡,議會喺建制派全力配合下,令不受市民歡迎嘅施政都可順利通過,中聯辦一聲令下建制派就會全部歸位,一國兩制嘅削弱係昭然若揭。

Ann姐即刻起身激動反駁,話《議事規則》規定議員唔可以猜度事情,反問葉建源「咩中環西環一聲令下,你聽過咩?」佢話如果自己唔回應,就即係承認葉建源嘅講法。Starry見狀,就叫Ann姐個名叫停佢,但就被Ann姐指住鬧:「你唔好叫我個名!」Ann姐鬧完呢句之後,就被Starry熄咗佢個咪。

Starry話,議員如果要回應其他議員嘅說話內容,可以按掣要求發言,葉建源之後繼續發言,正自行離場嘅Ann姐即時再忍唔住,大聲反問葉建源「市民幾時有睇到呀?喺邊度睇到呀?你講!」Starry再次要求Ann姐保持肅靜,而麥美娟亦行埋去Ann姐隔籬,用手捉住Ann姐勸交,亦被Ann姐鬧:「嗱你唔好郁我!」

其他報道:荃灣墜鋁窗擊傷女途人肩膊

其他報道:法庭大堂外刀捅前妻腰 男子認傷人還押候判

相關字詞﹕立法會 蔣麗芸 李慧琼 葉建源 麥美娟 中聯辦 建制派 一國兩制 逃犯條例 編輯推介

上 / 下一篇新聞