港聞

下一篇
上一篇

【Emily Online】政制局小冊子黃傘變藍傘 港大學生會前會長:無謂又令人心寒 (20:02)

自從雨傘運動後,黃、藍等顏色都各自有新嘅含義,港大學生會前會長孫曉嵐早前發現,政制及內地事務局印制嘅《聯合國兒童權利公約》小冊子近日推出新版本,但其中一版除咗將黃傘變成藍傘外,未見其他改動。孫曉嵐認為黃傘對唔少港人而言係雨傘運動嘅象徵,質疑政府進行政治審查。政制及內地事務局就強調,有關顏色更改純屬公關宣傳考慮,並無其他因素,仲話局方對顏色係開放態度,例如粵港澳大灣區規劃綱要印刷文本、宣講會背板都係用黃色咁話。

話說孫曉嵐喺facebook發帖,話政制局印制嘅《聯合國兒童權利公約》小冊子,入面有完整公約條文,亦都有方便細路仔睇嘅圖文並茂簡單版條文。但係佢想搵吓去年嘅更新版本有咩改動時,主要發現封面背景由黃色變咗藍色、其中一頁圖片除咗將小朋友所舉嘅黃傘改動為藍傘之外,其他內容都冇改變。

孫曉嵐認為,黃傘對唔少香港人而言係雨傘運動嘅象徵,但對本身會睇小冊子嘅兒童,睇到雨傘都唔會諗到雨傘運動,質疑政府對出版近10年嘅刊物進行政治審查,「真係又無謂又令人心寒」。

政制局同Emily講,小冊子由2009年開始派發,去年因為存量不足需要再次加印時,藉機會更新小冊子有關資料,並更改整體色調,以期令受眾對小冊子保存新鮮感,「此純屬公關宣傳考慮,並沒有其他因素」。當局又話,局方對各項宣傳推廣事宜上採用的顏色存開放態度,「例如粵港澳大灣區規劃綱要的印刷文本,以及粵港澳大灣區宣講會的背板均採用了黃色」。

其他報道:印尼周三大選 香港等海外票站今起予選民投票【多圖】

其他報道:九龍城潑水節與眾同樂 市民裝備十足水戰【圖輯】

相關字詞﹕雨傘運動 孫曉嵐 政制及內地事務局 聯合國兒童權利公約 黃傘 粵港澳大灣區 編輯推介

上 / 下一篇新聞