港聞

【Emily Online】葉劉:新民黨關心基層支持政府 戰區選要問准女兒 (21:44)

新民黨今晚喺荃灣如心海景酒店舉行8周年晚宴,特首林鄭月娥、政務司長張建宗、財政司長陳茂波等官員到賀,新民黨主席葉劉淑儀話,新民黨創黨格言係「親近民心、革故求新」,好多人以為新民黨係中產黨,但新民黨非常關心基層,支持特區政府施政,興建公屋、推行過渡房屋計劃等。佢又話,8年來新民黨都有接受選舉考驗,今年底區議會選舉該黨將會有30幾人參加,佢仲話「包埋我都唔定(參選),如果我個女批准」。

葉太又提及,為解決領展問題,她將提私人條例草案,用立法形式解決深層次問題。

其他報道︰【佔中九子案】余若薇︰九子感染更多人繼續抗爭

上年先加入新民黨做副主席嘅保安局前局長黎棟國話,新民黨唔止逐步成長,亦經直選洗禮,面對全港各階層市民、選民,做事只係諗住「市民所需」,該黨會全力支持政府搞好香港。黎棟國近排曝光率都幾高,又落區同新民黨區議員、社區幹事拍片介紹區情,搞到有人猜測佢會參選。佢喺台上話,新民黨着重培訓新人,呢排頻頻曝光,係用「呢副老骨頭」盡力支持佢哋。

新民黨副主席容海恩、南區區議員陳家珮同該黨青委執行副主席葉沛霖等席間一齊上台大展歌喉,同埋公務員合唱團唱咗幾首經典歌曲;康山社區幹事劉聖雪仲玩埋花式跳繩㖭!

其他報道:【深水埗槍擊案】釣魚機使詐被揭發 男子追款不遂槍傷賭檔負責人

其他報道︰李家超:須居安思危強化反恐能力

相關字詞﹕新民黨 葉劉淑儀 黎棟國 容海恩 陳家珮 林鄭月娥 張建宗 陳茂波 區議會選舉 區選 選舉 領展 編輯推介

上 / 下一篇新聞