港聞

下一篇
上一篇

【Emily Online】馬時亨:港鐵40年只加價4倍 樓價升幾十倍 (22:11)

馬時亨到今年中就會卸任港鐵主席,過去一年港鐵發生唔少風波,馬時亨都有唔少負面新聞,佢今日(6日)最後一次以主席身分出席一年一度嘅傳媒聚會,其間仲大吐苦水。佢話自己好多怨氣,例如「OK論」原本係講緊高鐵,但畀人「移花接木」用咗喺沙中線,又提番早排港鐵荃灣線撞車之後,佢明明係去北京開會,又畀人「屈」,話佢去上海打golf。

相關新聞:馬時亨:我哋話你知OK,就得㗎啦

不過馬時亨之後得到傳媒老行尊指點,話「你咁耐,都未慣?」佢就開始就對負面新聞一笑置之,仲話自己唔會亂咁告傳媒,「告你哋?嘥錢又傷身,唔告!」

港鐵今年通車40周年,馬時亨話,香港呢40年嚟由「爭氣之都」變咗做「怨氣之都」,佢話,自己46年前大學畢業出嚟做嘢,當年人工1600蚊,喺中環食一碟碟頭飯1蚊,市區樓呎價200蚊。到咗今時今日,樓價升咗50至100倍,食飯升咗30倍,但大學畢業生人工淨係升咗10倍左右,難怪咁多怨氣。

跟住佢話鋒一轉,又為港鐵抱不平,話港鐵咁多年嚟,加價幅度其實落後於食同住,地鐵喺1979年通車時,觀塘到九龍灣票價1蚊,而家4個半(編按:成人八達通票價實為4.6元);觀塘去石峽尾當年2蚊,而家8個半,加幅係4倍左右,跑輸食、住嘅通脹,但有咁多人鬧港鐵加價,「因為係政府嘅公司,如果唔係,大家一定覺得平」。

另外,港鐵前車務營運總管兼「吉祥物」李聖基(基哥)舊年退休,基哥今日交咗棒畀新吉祥物,就係以市區列車為造型嘅「鐵仔」,嚟緊大家應該會喺港鐵站見到佢嘅身影。

其他報道:解放軍車遭吊臂車撞尾 3人傷

其他報道:【票站失選民登記冊】聶德權致歉:選舉處兩年多無通報「不能接受」

其他報道:【逃犯條例】謝偉俊:互聯網世代下不能隻手遮天 李慧琼:毋須憂慮

相關字詞﹕馬時亨 ok論 高鐵 沙中線問題 樓價 物價 港鐵票價 吉祥物 鐵仔 編輯推介

上 / 下一篇新聞