港聞

下一篇
上一篇

【Emily Online.短片】夏蕙BB變身人魚 呼籲年輕人守護大嶼 (22:15)

「明日大嶼」方案惹來唔少環保團體激烈反對,今次綠色和平就請嚟網民愛戴嘅夏蕙姨(夏蕙BB)幫手,化身美人魚拍攝短片,呼籲年輕人一齊守護大嶼,「唔好搞個海!」

綠色和平嘅宣傳片段一開始,夏蕙姨就話:「梗係反對啦!香港無地方咩?點解要填海啊?」然後畫面一轉,夏蕙美人魚已經坐咗喺海邊,話香港而家個海愈填愈窄,自己失去家園,請求年輕人帶佢返大海。一個年輕男子一口答應,推住瞓喺浴缸嘅夏蕙姨,辛辛苦苦咁尋覓大海。

夏蕙姨途中話:「大嶼山有香港最長嘅海岸線,係香港自然環境一道重要嘅防線,我哋點解要犧牲自己最靚、最美好嘅地方呢?」然後,年輕人用「公主抱」抱起美人魚夏蕙姨,奔向大海。夏蕙姨仲好激動咁話:「海啊!到啦!」

最後,夏蕙姨語重心長咁講:「年輕人,齊齊跟住我,守護大嶼,唔好搞個海!」有網民話好欣賞夏蕙姨肯咁樣企出嚟反填海。條影片post咗3個鐘,有16,000人睇過,665個人畀like。

綠色和平喺網上發起守護大嶼聯署,話香港有比起「明日大嶼」更明智嘅選項,呼籲市民一齊發聲,要求政府優先發展棕地,放棄「明日大嶼」。

其他報道:反東北示威者向警索償案 影片見周諾恆上警車前臉額無傷

其他報道:地球之友前經理假學歷受聘支薪40萬 被控欺詐

相關字詞﹕emilyonline 明日大嶼 黃夏蕙 夏蕙bb 美人魚 綠色和平 大嶼山 擱淺 編輯推介

上 / 下一篇新聞