港聞

下一篇
上一篇

【Emily Online】張超雄傷腰坐輪椅:原來等港鐵用板要等四班車 (15:55)

工黨立法會議員張超雄扭親條腰接近一星期,去立法會開會時要輪椅代步。今日(24日)凌晨,佢喺fb專頁分享感受,話呢幾日令佢更加體會病人同殘疾人士嘅困苦,仲好感慨咁話:「健康的人真的不明白病人的困苦;飽肚人不明肚餓人的愁。這個社會,都是為健康和飽肚人而建造的。」

張超雄噚日去咗長毛梁國雄介紹嘅中醫師求診,一去就成個下晝,初嘗坐輪椅,佢發現殘疾人士出入遇到嘅難處,「原來地鐵車廂和月台的隙縫是如此闊,對電動輪椅做(造)成危險;原來要等地鐵職員用板要等上四班車。」一次就診就令到佢疲累不堪,「這些都是我以前認知的,但發生在自己身上,真是有另一種知(滋)味」。

點解張超雄今次會整親?佢喺帖文透露自己係因為一時心急扶抱屋企人而扭傷,當時下腰劇痛、全身都郁唔到,搞咗個幾鐘依然寸步難行,唯有叫白車入急症。分流䕶士將佢定為第四類次緊急,坐急診室輪椅個幾鐘愈坐愈痛,之後請護士畀佢瞓低,前後等咗三個半鐘見醫生,打咗止痛針後入觀察病房住一晚,照X光之後醫生話無骨傷,畀消炎止痛藥就出得院。

衛生事務委員會開會討論《罕見疾病條例草案》,雖然張超雄話已經冇辦法應付原本安排好晒嘅行程,不過草案由佢提出,點可能缺席有關會議呢?同事為佢向立法會借咗部手推輪椅,「但由於每次走動都要勞煩別人,就算去廁所也要找人幫忙,心裡不舒服。」佢話之後辦事處同事竟然為佢借咗部電動輪椅,「給予我走動的自由,真是讓我夢想成真!立法會亦因應我的情況作出特別安排,讓我使用電動輪椅進出會場發言和投票。」

張超雄又話佢喺屋企行咗幾分鐘已經好攰,「我以為自己有的能力,和現實竟然有這麼大的距離!對於自己身體狀況的衰退,實在很難接受!」

其他報道:自願醫保下月面市 陳肇始:業界反應積極 月底公布首批認可產品

其他報道:東涌線欣澳站至東涌站服務暫停 機場快線香港站至機場站服務未恢復

其他報道:國泰機師染麻疹 機場第5宗 19個案只公布9宗資料 醫生航空業批衛署信息亂

相關字詞﹕emily online 張超雄 輪椅 殘疾人士 地鐵 編輯推介

上 / 下一篇新聞