港聞

【Emily Online】陳勇誤當唐偉康為英國領事 抵北京主動見傳媒道歉 (19:34)

美國駐港總領事唐偉康近期就一國兩制情況發表評論,港區全國人大代表陳勇今日啟程前往北京出席全國兩會前,喺香港嚴辭批評唐偉康嘅評論,但搞錯咗評論係語出英國總領事,連續3分鐘力數英國不是,又話過去幾日收到好多市民「譴責英國駐港領事言論」。陳勇夜晚抵達北京,就主動向傳媒補充,仲向英國方面致歉。

相關報道:陳勇促美國駐港總領事唐偉康向全中國人道歉

陳勇喺香港機場啟程前形容,英國歷任首相對香港一國兩制評價好高,連蘇格蘭同愛爾蘭領袖都提出效法一國兩制,解決脫歐等問題。佢話作為英國外交官,應該對祖國有更多貢獻,之後繼續力數英國國內面對嘅問題,話相信英國都唔想其他國家干預。

陳勇夜晚抵達下榻嘅北京飯店時主動見傳媒,承認睇番相關資料後,發現自己講「講錯咗」,向英國總領事表達歉意。陳勇之後借題發揮,話每個人如果說話有唔妥當,喺搞清楚實際情況後,都應該向對方表達真誠歉意,「知錯應該要改」,佢希望唐偉康就「不妥當言論」向香港以及全國市民道歉。

佢強調,「每個國家都係守護緊自己嘅法治」,認為唐偉康應遵守所在地嘅法律,「做啲符合佢外交官身分嘅言行」。

其他報道:成報主席稱險遭國安綁架 警:拘兩內地人 無證據起訴

其他報道:觀塘月華街地盤墜木方 工人走避不及遭擊斃

相關字詞﹕陳勇 唐偉康 一國兩制 編輯推介

上 / 下一篇新聞