港聞

【Emily Online】陳健波批范國威發癲惹罵戰 陳淑莊哭問:點解議員問問題會被話「發癲」 (18:52)

立法會財委會今午開會時火花四起,新民主同盟范國威(Gary)喺發言時批評,財委會主席陳健波鍾意做「咪霸」、有佢講無人講,又成日批評發問嘅議員係阻頭阻勢,波哥反駁話已經對Gary盡量遷就,但結果Gary喺度發癲、顛倒是非。波哥此話一出,即引起民主派議員群起提規程問題,要求波哥道歉同收回言論。波哥原本決定休會5分鐘,結果超時休咗會成十幾分鐘,其間建制派何君堯喺座位隔空同泛民罵戰,民主派會議召集人毛孟靜叫佢「Shut up」,何反叫「you better shut your big asshole up」。何君堯仲重演向民主派舉起手做鬼臉,拎埋部電話出來扮影民主派,但Emily見到何君堯其實無開到相機。

其他報道:【三隧分流】民主派九成議員反對新方案 譚文豪批「拎返啲冷飯菜汁畀我們食」

事發時傾緊「2021年人口普查的資訊科技設備和服務」,波哥堅持係Gary極度無理、對主席人身攻擊,話佢發癲係合理,亦唔會收番。何君堯提規程問題幫口,話見到范國威同陳淑莊喺位上叫囂,行為極不檢點,主席可要求佢哋退席,而話范發癲係有事實根據。

公民黨郭家麒批評,用「發癲」係侮辱、歧視精神病人,甚至希望即刻處理對陳健波嘅不信任動議。

休會期間,何君堯同陳淑莊開始罵戰,何話陳「燒fuse」,坐喺何附近嘅建制派班長廖長江勸何君堯「一人少句」,何話「無得少句」,繼續批評民主派點解要糾纏喺「發癲」呢句。陳淑莊鬧鬧下喊起上來,話唔明點解議員問問題都會被人話係發癲。旅遊界姚思榮想拉何君堯出會議室冷靜下都唔成功,何君堯同民主派繼續對罵。

休會完畢,毛孟靜再建議波哥收番句「發癲」,否則將來人人都可以指住波哥話「發癲」。熱血公民鄭松泰話,如果發癲可以講,將來可能議員會更多描述,例如「發花癲」;如果Gary發癲係事實嘅話,佢坐喺Gary附近仲驚,會擔心佢安全。

廖長江就話,頭先睇到有議員嚴重挑釁議員,指出發癲喺香港係指有失控情況,仲話主席已講咗作出裁決。

陳健波向香港市民澄清,自己不會侮辱、歧視精神病人,佢話「發癲」係形容偏離正常做法,又話議員嚴重挑釁主席,希望議員檢討自己,認為今日議員行為情緒高漲,強調「無意將發癲合法化」,「日後我又好,你又好,官員都好,都唔希望做呢個字互相形容」。

其他報道:【網上熱話】聖保祿中學被指禁學生Last Day拍照 校長稱正了解 警證曾接報案

【大灣區】韓正:三地社會參與熱情前所未有 林鄭:竭盡所能推動大灣區發展

相關字詞﹕立法會 陳健波 范國威 陳淑莊 何君堯

上 / 下一篇新聞