港聞

下一篇
上一篇

【Emily Online】用好多糖鼓勵少糖 究竟破乜「世界紀錄」? (15:33)

近年成日都話食嘢要記得減鹽減糖,食衛局同降低食物中鹽和糖委員會,就一直好努力做唔同嘅活動推廣。今日大館就有「少鹽、少糖、少.確幸」活動,大會仲一早預告,話會有破「世界紀錄」項目㖭!

其他報道:【多圖】飛行服務隊購7部法製「獵豹」新直升機 提升搜救能力導航精準度

原來由今年起,有近500間食肆都提供少鹽少糖嘅選擇畀食客,慳慳埋埋已經慳成700萬克糖喇。佢哋今日就嘗試用部分嘅糖,砌出一個世界紀錄上最大,長闊80厘米,高30厘米嘅「方糖金字塔」。

不過佢哋唔係破健力士紀錄,而係「世界紀錄協會」嘅紀錄。協會代表在場用軟尺同本紅色嘅證書,幫忙度金字塔嘅尺寸,然後正式宣布破咗紀錄。

Emily上去「世界紀錄協會」個網,出咗預設顯示簡體字嘅網站,話自己喺香港註冊,「為全球世界紀錄愛好者提供優質的紀錄服務」,又話「特別是在中國和印度兩個人口大國,許多的世界紀錄愛好者展現了他們獨一無二的才能」。

有早到嘅行家望到,有一大箱太古方糖放咗喺地下,入面仲有用剩零星幾包方糖。相信座山就係用呢啲太古方糖砌成。活動期間有一個沙畫表演,竟然又係用一堆鹽嚟畫。官方話製作金字塔所用嘅方糖同鹽會落入一套試管形教具作教學用途,用來展示一啲食物嘅糖同鹽含量咁話。

不過點講都好,少鹽少糖的確係值得推廣嘅。食衛局長陳肇始都話自己平時最愛叉燒飯,但點都會叫走汁,因為無咁鹹嘛。活動仲有啦啦隊跳舞,都好好睇㗎!

其他報道:本土研究社:政府歸咎土地供應不足是「賴地硬」 促打破資源分配傾斜

其他報道:收回高球場屬民粹?黃偉綸:政府不能單用民調管治社會

相關字詞﹕食衛局 降低食物中鹽和糖委員會 少鹽 少糖 方糖金字塔 陳肇始 世界紀錄 編輯推介

上 / 下一篇新聞