港聞

【Emily Online】工總記招講大灣區 放計時器控制發言時間 (16:04)

立法會議員開會時,通常都有限制發言時間,𠵱個規定原來喺工業總會都有推行。今日工總開記者會,回應《粵港澳大灣區發展規劃綱要》,安排咗7位負責人出嚟見記者,包括本身代表工總擔任工業界(第一)議員嘅立法會主席梁君彥。

按照schedule,成個記者會歷時一個鐘,頭半個鐘係工總各代表發言,後半個鐘係記者提問。唔知係咪因為有梁君彥在場,個記者會時間控制得好嚴格,工總主席郭振華一早規定,每位工總代表開場發言都唔可以超過3分鐘,確保成個開場發言可以喺半個鐘內完成。郭主席仲set埋計時器,一夠3分鐘就會響,佢亦會要求講者停止發言,交俾下一位講。

工總副主席嚴志明就因為超時而被打斷,佢講到製造業點樣調整結構時,個計時器就響起,佢即時要停止發言。Emily事後問返嚴志明,佢話原本想講埋專業服務有咩機遇,但理解好多講者都有嘢想分享,所以被打斷都無辦法。

講返工總對《綱要》嘅意見,佢哋認為大灣區要促進人流、物流同資金流通。因應港珠澳大橋使用率偏低,工總建議政府考慮畀啲無兩地牌嘅香港私家車,經港珠澳大橋揸車去內地,又認為高鐵一地兩檢實施順暢,建議擴展至更多口岸。

其他報道:「香港01」遣散逾70名員工

其他報道:危駕致他人嚴重受傷罪成 九巴女司機還押候判

其他報道:副警務處長趙慧賢4月接任申訴專員

相關字詞﹕工業總會 工總 梁君彥 大灣區 郭振華 粵港澳大灣區 一地兩檢 港珠澳大橋

上 / 下一篇新聞