港聞

【Emily Online】梁栢賢:唔好叫醫生上大灣區開檔 指北上開醫院唔會搶走人手「誤導」 (23:23)

公立醫院服務「爆煲」,醫護壓力沉重。醫院管理局今日舉行新春團拜,食物及衛生局長陳肇始話,醫管局總部近日都「好頭痛」,幾乎「不眠不休」處理問題;陳肇始仲預告,財政預算案會有好消息。醫管局行政總裁梁栢賢(PY)亦話呢排成日失眠,「諗起(陳肇始)局長就瞓唔着」。

其他報道:【大灣區】列大灣區四大原則 發改委林念修:讓民眾獲幸福安全感

PY話見到醫院迫爆,夜晚都會諗下,「做咗咁多年,我自己都有責任,醫管局係咪咁差呢,係咪對唔住啲同事,對唔住啲病人呢?」不過,PY話,諗返轉頭,真相又未必一定係咁,「安慰下自己」,佢話相信人手問題先係癥結,長遠亦有機會解決,但要有好嘅政策去處理,「要人出嚟講清楚,真係唔好叫醫生上大灣區開檔」。

PY話,有醫生早前指,北上開醫院唔係搶走醫管局人手嘅講法,係有誤導成分,因為不論公家私家,都係得一班醫生,「私家醫生都係醫管局訓練出嚟」,擔心會加劇醫管局人手流失。被問到唔北上嘅話,會唔會比人話「唔擁抱國家」時,PY就話,大灣區個概念,係要支持國家醫療發展,但大前提係唔可以令香港市民有損失。

至於近日討論豁免海外醫生實習時間,同場嘅醫務委員會主席劉允怡話,現時已檢討緊有限度註冊制度。被問到可否完全豁免實習時間,佢話,如果要「一日都唔使實習」嘅話,就要修例。

PY話,如果海外醫生喺醫管局做咗一段時間,熟悉醫管局運作,對於考獲執業試後完全豁免實習嘅建議,佢覺得即使牽涉修例,都可以考慮。

其他報道:【大灣區】林鄭月娥:大灣區不會致兩制界限模糊 港不會被內地同化

其他報道:心理衛生會調查:港抑鬱指數見新高 18至24歲最嚴重

相關字詞﹕醫管局 梁栢賢 大灣區 醫護壓力 粵港澳大灣區 公立醫院 編輯推介

上 / 下一篇新聞