港聞

下一篇
上一篇

【Emily Online】羅致光稱不視民望如浮雲:說話被斷章取義「自己攞嚟」 (20:45)

特首林鄭月娥上周六(16日)同高層官員一齊開集思會,其中一個課題係如何改善與傳媒關係,咁啱勞工及福利局長羅致光(CK)今日就約咗一班傳媒飯聚,由自己易有腸胃問題、講到風水同埋仲有民望。發生長者綜援風波後,CK嘅支持率淨值急瀉21個百分點,去到1%,佢今日話都預咗自己民望會跌,唔會視民望如浮雲,因為公眾唔鍾意一個官員嘅話,解讀說話都會負面啲,亦可能唔相信你。

其他報道:外判工公廁進食惹熱議 食環工會批署方制度「刻薄寡恩」

官員回答問題好多時都要跟「line to take(官方答案)」,CK話唔跟先辛苦,笑言認同中大政治與行政學系高級講師蔡子強所言,因為佢好辯,所以失分;又話工聯會立法會議員麥美娟叫佢「叻少陣得唔得」,都講得啱。

智商160的CK話,細個已經被人話「招積」,解釋讀書叻嘅人通常都慣答問題,教書多年又會分析其他人提問時係咪有咩理解錯、唔明白,所以除咗答問題之餘,仲會詳細解釋。

佢話,喺議會同上電台好多時都係一個辯論嘅場景,有時第三者唔知上文下理,可能會斷章取義。不過,佢話被斷章取義都係「自己攞嚟」,因為啲說話的確出自佢口。佢預計,都要一年半載先可以挽回公眾對佢嘅信心。

至於經常被批評「離地」,CK反駁好多情況佢都知道,舉例佢知道年紀愈大搵工愈難,知道有人搵50幾次工、100次工都失敗,會唔想再搵工同失望,但喺佢身上的確無出現呢個情況,所以佢唔會話感同身受。至於可唔可以調較一下自己講嘢嘅態度,佢話,自己做咗咁多年人,唔係咁易改變。不過,佢提到如果冇同理心,當初又點會做社工。

作為渡海泳常客嘅CK自爆,腸胃由細個開始就唔多好,笑言成日睇「婦科醫生」,因為覺得唔舒服,就會搵佢做婦科醫生嘅哥哥幫手;細個有一次仲爭啲死,馬姐孭住佢去睇醫生,一路嗌住「光仔唔好死呀」。佢憶述細個成日傷風,醫生話因為佢鼻哥窿大,叫佢搭巴士唔好成日坐窗口喎。

CK仲識得睇風水,但佢話唔會隨便幫人睇掌睇相,因為天機不可泄漏,而佢好早已經睇到自己會入官場,但無心去自證預言,本來打算退休後去揸的士喎。

其他報道:香港人口達748萬 去年逾4.2萬單程證者遷入

其他報道:【醫護壓力】事關單程證? 林鄭批「很有排斥性」無準確基礎 籲包容歡迎家庭團聚

相關字詞﹕羅致光 勞福局 民望 長者綜援 編輯推介

上 / 下一篇新聞