港聞

下一篇
上一篇

【Emily Online】陳茂波行年宵遇示威 棄座駕搭港鐵 (14:39)

農曆新年就快到,財政司長陳茂波今日去維園出席經民聯年宵攤檔啟動禮,之後仲特別去一啲本地創作同學生搞嘅攤位,同大家打氣,仲身體力行消費,買咗啲豬年產品。不過,佢臨走時就遇到社民連秘書長陳寶瑩,拎住個「港人即付興建大白象工程 港元一萬億」攬枕示威,一路追到陳茂波去佢紅色座駕。

陳茂波無接到攬枕,亦無上座駕,去咗搭港鐵。Emily跟佢入港鐵,見到司長好順利咁喺口袋拎張八達通入閘。佢同Emily講,擔心影響到其他市民嘅安全,時值中午,所以搭港鐵去食飯。

陳茂波喺經民聯個「豬年乜都得」年宵攤檔啟動儀式發言嗰陣,不斷有市民畀意見佢。例如佢話到有個重要消息要透露,即係《財政預算案》喺今月27日公布時,有市民就喺側邊嗌「又唔係派錢,有鬼用咩」。唔知司長聽唔聽到呢?但佢接住嘅發言就強調,「會接地氣」做好預算案。

今年係「豬年」,司長話入到年宵市場,除咗見到佢近排熟悉嘅「嬲嬲豬」,仲見到好多本地創作、各有形態嘅豬產品。佢呼籲大家多啲消費,撐香港本地經濟。經民聯主席盧偉國就希望豬年香港政通人和、市民安居樂業。

之後,陳茂波喺經民聯監事會主席林建岳陪同下行年宵,先後去咗鄧鏡波書院、張祝珊英文中學,同西區少年警訊「豬式匯社」等攤位。其間陳茂波俾學生簇擁住,買咗個豬仔公仔,又喺一班年輕人開嘅攤位,買咗個「hello strangers」斜孭袋。

其他報道:【派錢4000元】今日起交表 投遞地址一覽

其他報道:【紅磡站工程新問題】金澤培認港鐵管理「直情做得差」

其他報道:包致金侄女涉停牌駕駛被捕

相關字詞﹕陳茂波 財政預算案 社民連 經民聯 年宵 維園年宵 編輯推介

上 / 下一篇新聞