港聞

【Emily Online】陳凱欣選舉開支146.2萬 印20萬張「掌心雷」獲捐巨型外牆廣告 (20:38)

喺上年11月贏出九龍西立法會補選嘅陳凱欣(Rebecca),前日交咗選舉開支。啲開支由10月2日佢宣布參選開始計起,總共用咗146.2萬。可能好多人同Emily一樣想知道,Rebecca去年8至9月擔任九龍社團聯會「健康大使」期間,喺紅磡多間殯儀館後面嗰幅巨型海報要幾錢,但選舉開支就無計算任何健康大使嘅宣傳開支在內;Rebecca之前亦一再強調,健康大使與選舉無關。

其他報道:防賄例管特首? 張建宗:涉憲制問題複雜 需時研究

陳凱欣另外收到約117.8萬嘅選舉捐贈,當中最大手筆嘅,係報稱價值2萬元嘅外牆燈廣告。提提大家,呢個廣告巨型到由港島眺望向紅磡祥祺中心方向,都可以清楚見到「請支持陳凱欣」嘅字眼,個面積同健康大使海報有得揮。外牆燈廣告由祥祺集團主席、全國政協委員陳紅天捐贈,基於呢個廣告只出現咗幾個鐘,出手都唔係低。

Rebecca喺facebook上載咗唔少宣傳片,佢投放做fb廣告嘅金額係大概1.6萬,網上同社交平台支援佢都用咗4萬元;用喺自己身上嘅個人開支,就只有攝影同影證件相兩項,共用咗約1.3萬元。另外,都見到佢用埋Wechat同電話短訊做宣傳,實體嘅傳單印刷就用咗約46萬。

比較特別嘅係喺一眾單據中,有一項寫明係「掌心雷」,用咗9000元,印咗20萬張。陳凱欣同Emily講,「掌心雷」係叫人投佢嘅小卡片,團隊只係用坊間大家都明嘅術語拎去印製啫。

由啲單據都可以睇到,陳凱欣選舉期間背後團隊嘅網絡;例如佢部分單張係幫襯油尖旺社團聯會同九龍城居民聯會印製;部分單張就由民建聯油尖旺地區支部同深水埗居民聯會拎去印刷公司印。

另外,Rebecca亦捐出約6萬畀香港復康力量,香港復康力量會長葉湛溪曾經為陳凱欣站台,葉嗰陣形容陳會為弱勢社群爭取福利。Rebecca同Emily講,超過1000元而無留下冇捐款者資料嘅捐款,佢唔會用作選舉,呢類捐款全數捐畀香港復康力量。

喺呢兩個月嘅選舉期間,佢請咗5個助理,用咗8.75萬,最高人工嗰位有3萬元,作為由10月2日至11月25日投票日擔任助理嘅薪金。

其他報道:獄中要剝光豬踎低抬頭答問題 黃之鋒向律政司索償:在囚人士都是人

其他報道:【流感肆虐】醫局請明星拍片為前線打氣惹爭議 陳凱欣:出發點好但離地 籲實際思考

相關字詞﹕陳凱欣 健康大使 立法會補選

上 / 下一篇新聞