港聞

【Emily Online】林鄭出動羊腩煲 打動白雪仙做戲曲中心開幕劇藝術總監 (21:38)

特首林鄭月娥近日常有感而發,繼噚日中環灣仔繞道通車儀式有感而發後,今晚佢喺西九戲曲中心開幕首演致辭時,就提起戲曲中心工程同樣艱巨,感覺激動之餘,仲講起佢原來親自用羊腩煲去打動「仙姐」白雪仙,出任開幕劇目嘅藝術總監。

戲曲中心開幕劇目係經典名劇《再世紅梅記》。開幕致辭時、西九管理局主席唐英年、白雪仙同林鄭月娥同場。唐英年致辭後,林太致辭時講起,佢喺邀請仙姐做開幕劇藝術總監方面有「功勞」,提到佢做政務司長之時,為咗想喺戲曲中心開幕時有殿堂級陣容,特意透過前立法會議員劉千石,邀請仙姐到政務司長官邸晚宴,並打探到仙姐最愛羊腩煲,特意準備以務求「雞脾打人牙骹軟」。林太話,謹慎嘅仙姐當晚雖然無即時答應,但其後終成事。

林太近日馬不停蹄,今晚睇完《再世紅梅記》開幕首演,又會趕去機場,凌晨搭夜機飛歐洲外訪。

相關報道:【短片】西九戲曲中心開幕 林鄭:有助提升香港文化大都會地位

其他報道:【流感肆虐.短片】集會護士:同事日做12小時恐難保病人安全 為病人續賣命料不會罷工

其他報道:【中環灣仔繞道通車】往中環方向下午塞足半小時 運輸署籲改行其他道路

相關字詞﹕西九 戲曲中心 林鄭月娥 白雪仙 再世紅梅記 羊腩煲

上 / 下一篇新聞