港聞

下一篇
上一篇

【Emily Online】勞工處開職位取消對冲 各黨議員齊抽水「魔鬼在細節」 (23:06)

取消強積金對冲個議題都爭議咗好耐,立法會財委會今日討論勞工處開設一個首席勞工事務主任常額職位,專責處理對冲事宜時,各黨派議員都忍唔住抽水,拎返特首林鄭月娥話議員支持上調長者綜援年齡單嘢出嚟講。

工聯會何啟明就話,呢兩日成日講「魔鬼在細節」,如果冇一個專門、熟悉嘅官員去講解取消對冲,落實之時分分鐘會出現問題。民主黨胡志偉都「戴頭盔」,講明就算佢贊成設常額職位,但係唔代表大家完全認同方案,叫勞福局副局長徐英偉「唔好好學唔學,學林鄭」,過咗就當大家支持。項目最終以35票贊成、5票反對、2票棄權獲通過。

審議項目期間,自由黨黨魁鍾國斌一度提出中止待續,話若果批出呢個常額職位,會唔會變咗等同支持政府嘅取消對冲終極方案?結果中止待續以7票贊成、35票反對、4票棄權被否決。

建築、測量、都市規劃及園境界議員謝偉銓就接力,提出俗稱「37A」嘅臨時動議,要求將常額職位改為編外職位,獲批准辯論,令民主派議員非常感慨。議會陣線區諾軒強調,議會應該尊重發言權利,臨時動議都應該容許發言,最終臨時動議以18票贊成、15票反對獲通過。不過有關議案並冇約束力,徐英偉講明政府不會撤回項目,但最終都獲通過。

其他報道:【長者綜援門檻提高】建制齊轟林鄭「議員批准論」 柯創盛稱900頁文件僅一項提及 容海恩反問有否聽民意

其他報道:【長者綜援門檻提高.短片】特首辦主任:特首無任何意圖擺任何人上枱

相關字詞﹕強積金對冲 對冲 強積金 林鄭月娥 長者綜援

上 / 下一篇新聞