港聞

下一篇
上一篇

【Emily Online】葉劉遊荷蘭遇劫 騷腿展示傷勢 (20:36)

新民黨主席葉劉淑儀早前透露,星期一除夕當日,同愛女遊覽荷蘭阿姆斯特丹時,遇到「電單車黨」企圖搶走佢個有10年袋齡嘅Kwanpen鱷魚皮手袋。佢及時緊捉住手袋力保不失,但就俾歹徒扯咗落地,搞到受傷。葉太今日喺立法會就向Emily展示傷勢,拉高褲管露出佢一向偏白嘅小腿,上面就有一個擦傷嘅傷口,手肘就另有一塊瘀青。佢話,好彩當日著咗兩件冷衫加一件大褸,先無咁傷,之後亦無睇到醫生,只係搵啲藥油自己捽,而家啲瘀都散咗唔少。

葉太話,喺荷蘭去到人多嘅地方時,由於擔心有扒手,所以會警覺啲,但事發當時阿姆斯特丹嘅街道好寧靜,令佢一時鬆懈咗,日後會更小心。

葉太今日仲拎住另一個手袋,重演當日案發經過。佢笑言,日後去到寧靜嘅地方,拎住手袋嗰邊會貼牆行,另一邊就搵個猛男傍住,咁就應該唔會再成為歹徒嘅獵物喇。

其他報道:【Emily Online】葉劉遊荷蘭力抗電單車黨搶手袋 遭拉跌倒地傷沒報警

其他報道:中大教授涉讓同車助理教授無牌駕駛 獲准離港赴史丹福大學任教

其他報道:【漁農美食嘉年華】攤販兩小時賣清椰菜 稱即場試食助銷情

相關字詞﹕葉劉淑儀 荷蘭 編輯推介

上 / 下一篇新聞