港聞

下一篇
上一篇

【Emily Online】葉劉遊荷蘭力抗電單車黨搶手袋 遭拉跌倒地傷沒報警 (21:35)

唔少政界中人都去咗旅行,迎接2019年。新民黨主席葉劉淑儀亦都孖住愛女,遊覽北非摩洛哥同英國倫敦。佢哋之後仲首度踏足荷蘭,就喺呢個「聖誕跨年之旅」最後一站,遇上驚險時刻。葉太今日喺facebook更新遊記,話自己喺除夕當日下晝5點左右,同女兒喺阿姆斯特丹名店區行街期間,遇到電單車黨!

其他報道:【短片+多圖.元旦遊行】港獨組織圖進公民廣場被阻 民陣考慮申司法覆核

葉太憶述,當時好多商店早已關門,街道甚為寧靜,一架電單車突然向佢衝過來,車上一名男子隨即捉住佢嘅手袋。葉太形容:「我下意識即時抓緊手提包及保護自己,雖然摩托車已把我拖跌倒地,但我仍拼命掙扎不肯鬆手,兩名男子見未能得逞,便匆匆逃去了。」葉太話,因為咁擦傷咗膝蓋同肘部,右肩亦感到痛楚。

葉太喺fb話,女兒即時扶起佢,唔少熱心市民亦上前慰問,問佢哋使唔使幫手報警。但葉太話,見未有財物損失,加上只係受咗輕傷,就馬上返酒店治理同休息。

葉太同Emily講,佢無報警,並已經同女兒回程,返香港之後會再檢查傷勢。佢話,個手袋入面有護照同啲卡,所以佢緊握唔放。佢冇影低酒店職員為佢治理傷勢嘅情况,但就影咗佢個手袋畀Emily睇,葉太話,個手袋係一個10年袋齡嘅Kwanpen鱷魚皮手袋,睇上去好名貴。

葉太喺fb度形容,呢趟驚險之旅好彩最終「有驚無險」。佢又提醒各位朋友,喺歐遊時到寧靜地方要格外留神,避免成為不法之徒嘅獵物。

葉太嘅遊記亦有記低喺阿姆斯特丹嘅美好經歷,包括同女兒品嚐咗食店非常美味嘅班戟,參觀咗甚具人氣嘅梵高博物館,同埋荷蘭國家博物館嘅「鎮國之寶」:十七世紀荷蘭著名畫家林布蘭(Rembrandt)嘅名畫《夜巡》(Night Watch)。

葉太又話,呢個城市有3個有趣特色,包括有好多售賣芝士同大麻嘅店舖,同埋門外掛住綠燈嘅咖啡店,即係代表俾顧客喺店內吸食大麻。

另外,有網民都喺葉太個fb留言關心。其中有網民指,「歐洲有不少匪徒專打劫中國遊客,法國為甚!」葉太就留言回應:「以為中國人大把錢,其實我手袋內一個歐羅都冇!」「只有港元!」

其他報道:中聯辦開設微信公眾號 宣傳一國兩制

其他報道:【多圖.元旦遊行】民陣望重聚民間力量 愛港團體圖中途加入惹罵戰

相關字詞﹕葉劉淑儀 荷蘭 電單車黨 編輯推介

上 / 下一篇新聞