港聞

【Emily Online】政府吉祥物齊賀聖誕 邊款最盞鬼? (16:25)

聖誕節普天同慶,政府部門各吉祥物紛紛祝賀Merry Christmas!Emily睇過當中5款受歡迎嘅吉祥物,睇吓邊款最盞鬼贏得網民歡心。

度天隊長(天文台):

天文台度天隊長喺facebook除咗提醒外出要著夠衫,仲話擔心大家空虛寂寞凍,專程推出8款表情趣怪、聖誕限定版Whatsapp Sticker作禮物,等大家可以「瘋狂互send過聖誕」。

任何仁(消防處):

消防處嘅任何仁上載facebook短片,任何仁一家佈置家居,祝「任何人聖誕快樂」。片入面仲有「小小任何仁」揭開藍色面紗露出真面目,小朋友個樣都好可愛㗎。

清潔龍阿德(食環署):

食環署嘅清潔龍阿德,以一首五音不全嘅「教會歌」短片,配上一幅阿德自己一個喺屋企睇片、貌似8位元嘅風格圖,道盡一班聖誕無人約「無嘢do」、唯有喺屋企執屋嘅人心聲。

大嘥鬼(環境局):

環境局大嘥鬼喺帖文將陳奕迅名曲《Lonely Christmas》配上新詞,配搭一幅由衣物堆砌而成嘅自製「環保聖誕樹」照片,呼籲網民上載自己嘅佳作,過一個低碳聖誕。有網民上載相片留言,指自己用咖啡罐砌出一棵「聖誕樹」呢。

滴惜仔(水務署):

水務署嘅滴惜仔帖文,大玩早前網絡瘋傳嘅機鐵機場站「Marry Chirstmax」路標改圖,趁機呼籲「識得惜水,聖誕零舍merry」。

其他報道:【Emily Online.短片】任何仁一家過聖誕 「小小任何仁」露真面目

其他報道:【聖誕求醫指南】醫管局12間普通科門診如常服務(附名單)

其他報道:「紙上聖誕老人」 義工以愛心回應童心

相關字詞﹕度天隊長 任何仁 清潔龍阿德 大嘥鬼 滴惜仔 編輯推介

上 / 下一篇新聞