港聞

【Emily Online】除夕煙花匯演12月31日舉行 引入意大利獲獎煙花「星空萬花筒」 (17:39)

話咁快又年尾,準備迎接2019年來臨!一年一度的除夕倒數煙火音樂匯演今年一樣喺12月31日舉行。旅發局話,今年維港上空煙火匯演引入咗意大利獲獎嘅煙花,會有「星空萬花筒」嘅效果,最後一分鐘更會一次過展示45種圖案,務求為一眾市民帶嚟震撼視覺嘅享受!

旅發局話,今年除夕煙火音樂匯演將歷時10分鐘。成個煙火匯演同往年一樣,用到5艘躉船,煙火畫面由中環延伸至天后,有成1100米闊,高300米。其中一幕「星空萬花筒」更加會使用喺多個比賽獲獎嘅意大利Panzera煙花,圖案就好似萬花筒一樣,顏色同圖案都不斷變化。

而且,今年特別請嚟著名音樂監製趙增熹編製背景音樂,匯演視覺分為5個層次,除咗煙花外,會展外牆都會顯示「2019」字樣同祝福語。另外,當晚11點起,港島3座建築物都會每15分鐘喺樓頂發放「許願流星」煙花,俾市民同旅客許願。

旅發局節目及旅遊產品拓展總經理洪忠興就話,今年成個匯演預算會用1400萬,因為取消咗舞蹈匯演,所以總使費可以比去年少約100至200萬。旅發局又同Emily講,尖沙嘴海濱花園、香港文化中心露天廣場沿海一帶、中環海濱、中環9、10號碼頭同金紫荊廣場都係推薦嘅最佳觀賞位置。

而如果市民怕出街同人逼,只想留喺屋企睇電視就留意啦,因為今年旅發局同ViuTV合作,節目首次喺99台直播啊!

其他報道:【短片】涉旺角高球桿追打街邊黑狗 五旬漢涉殘酷對待動物被捕

其他報道:【港鐵4線故障】港鐵指當4宗事故計算 按機制罰800萬元

其他報道:本土研究社:港25年棕土面積增近五成 質疑政府「數漏嘢」

相關字詞﹕除夕倒數煙火音樂匯演 煙花 除夕 編輯推介

上 / 下一篇新聞