港聞

下一篇
上一篇

【Emily Online】「魚鱗雲」靚相洗版 天文台介紹「高積雲」離地有多高 (18:35)

相信唔少市民嘅社交平台,今日都被一張張「魚鱗雲」嘅靚相「洗版」。天文台傍晚喺facebook出post,介紹呢種吸引大家影相留念嘅雲嘅真身——「高積雲」。

天文台話,高積雲(Altocumulus,簡稱Ac)屬於「中雲族」,雲底距離地面2000至6000米。呢種雲通常呈灰色、白色或兩色並存,有時似一片片碎裂瓦片或磚塊,有時又會一排接一排好似波浪咁出現。高積雲有時呈現纖維狀或擴散模樣;大部分排列整齊嘅小雲塊,「視覺寬度」都喺1至5度之間。

今日攝記同事李紹昌都影咗兩張高積雲嘅相,Emily喺公司見到,都忍唔住大叫咗一句「好靚呀」!昌哥嘅相入面,仲見到太陽周圍出現「日華」(Corona)。天文台解釋,「華」是當太陽光或月光等自然光源,穿過高積雲等薄雲層、薄霧或霧中嘅小水滴,產生繞射作用而形成,「日華」會以太陽為中心,呈現為一組或多組由內裏白色帶藍,逐漸減弱到接近邊緣呈啡紅色嘅彩環。

其他報道:米芝蓮2019美食推介出爐 「請坐」台媽新店「吃什麼」上榜 店主哽咽感激

其他報道:【華為孟晚舟案.多圖】孟晚舟特區護照曝光 有效期至2021年

相關字詞﹕高積雲 魚鱗雲 中雲族 日華 天文台 天氣速遞 編輯推介

上 / 下一篇新聞