港聞

下一篇
上一篇

【Emily Online】德領事館小豬圖教「毛公仔」德文 網民:抽到今日冇雨落 (12:08)

漁農自然護理署為咗非洲豬瘟演習,喺星期二(4日)出動大批粉紅色豬毛公仔,畀人員練習殺豬,引來唔少網民關心呢批「陰公豬」嘅去向同身價,署方就回覆話每隻豬公仔700蚊,於是又有網民上淘寶發現淘寶價只需452蚊人仔,再成話題。喜歡喺Facebook教網民德文詞語嘅德國駐香港總領事館,今日就教「毛公仔」(英文:stuffed toy/ animal)一詞的德文「Kuscheltier」,幅圖仲有一堆小豬毛公仔,再畀網民封為「德國駐香港抽水站」。

漁護署早前話「練習殺豬」活動有30多人參加,用咗28隻道具豬同兩隻道具小豬,價錢分別係每隻$700同埋$80。計一計,即係總共用咗$19,760。但唔少人留意到淘寶網都有賣同「陰公豬」差唔多樣嘅毛絨凳仔,分別係長50厘米公仔款,同埋1.1米梳化款,售價係64至452蚊人仔,似乎比署方購入價平好多。

事隔冇幾耐,德國駐香港總領事館最新的「每周一字Word of the week」環節,就趁勢教網民「毛公仔」嘅德文「Kuscheltier」,又舉出例句:「啲毛公仔好得意呀!」(Die Kuscheltiere sind so niedlich!)。即刻有網民留言話:「呢排毛毛雨,又畀你抽乾」,「抽到今日冇雨落」。

相關報道:【Emily Online】漁護署殺豬演習 大豬700元一隻

其他報道:尹兆堅林卓廷遭預約檢控 事關議會被逐拒離場 議員首涉「礙立會人員執行職務」罪

其他報道:尹兆堅:對被檢控感莫名其妙 楊岳橋:議會班房化 謝偉俊:市民不想議會黑社會化

相關字詞﹕漁護署 德國駐香港總領事館 每周一字 編輯推介

上 / 下一篇新聞