港聞

下一篇
上一篇

【Emily Online】漁護署殺豬演習 大豬700元一隻 (20:58)

漁農自然護理署為咗非洲豬瘟演習,喺星期二(12月4日)出動大批粉紅色豬隻毛公仔,畀人員練習殺豬。消息一出,唔少人關心呢批「陰公豬」嘅去向同身價,仲有人話想收養佢哋。漁護署回覆話,當日有30多名漁護署人員參與演習,用咗28隻道具豬同兩隻道具小豬,價錢分別係每隻700元同埋80元。計一計,即係總共花咗19760元。

相關報道:【Emily Online】嚴防非洲豬瘟 漁護署用公仔練殺豬

Emily聽聞,其實呢批豬仔無被銷毀,漁護署會照顧佢哋一生一世,暫時放喺倉庫,下次演習,就會再出動。

漁護署用道具豬仔嚟演習,過程中啲相片係嚟自食物及衛生局長陳肇始Facebook。有人留言讚豬仔得意,想領養一隻,又有人話:「排,殺完隻豬唔要可唔可以俾隻我?」仲有人留言,展示淘寶有售同「陰公豬」差唔多樣嘅毛絨凳仔,分別有長50厘米公仔款,同埋1.1米沙發款,分別賣64元至452元人民幣。

對比漁護署購入價,網民發現個淘寶價,似乎平好多喎!

漁護署今次演習,係要加強應變力,應對萬一香港出現非洲豬瘟,若本港豬場有豬隻證實染疫,場內嘅豬就真係要銷毀,主要會以二氧化碳撲殺,實際情况仲要睇場內豬隻數目、健康狀况同體型等,再按國際動物撲殺指引決定。

其他報道:借卡通貓「癲噹」教公民價值 免費公民教育年曆明起派發

其他報道:【注意!】冷鋒殺到 明氣溫跌近10度 打鼓嶺周日周一最低僅9度

相關字詞﹕非洲豬瘟 二氧化碳 豬公仔 陰公豬 編輯推介

上 / 下一篇新聞