港聞

下一篇
上一篇

【Emily Online】醫生母去信醫院質疑假期受訓違法 醫管局人力主管:呢一輩上司要處理埋阿媽 (20:42)

醫管局總辦事處人力資源主管彭飛舟上任接近兩個月,今日喺傳媒茶敘分享心路歷程。醫管局有7萬幾名員工,要保持有效溝通認真唔容易,彭飛舟醫生就話,觀察到依家同年輕醫生嘅溝通方式唔同咗,有醫生媽媽會寫信去醫院,質疑假期接受培訓違反勞工條例,笑言「呢一輩嘅supervisor(上司)要處理埋阿媽」。

其他報道:網傳撐撲殺流浪動物惹爭議 陳凱欣上傳愛犬合照反擊 批抹黑誣衊

彭飛舟話,以前嗰代嘅醫生師徒關係好強,例如瑪麗醫院外科醫生結婚,都會問過部門主管。佢仲話,當年教授對學生亦都相當嚴格,佢當年讀書年代,就試過因為對皮鞋唔合規格,被要求喺病房當場除鞋,成對鞋被掉出門外。但係依家嘅師徒關係就有所改變,年輕醫生會覺得係嚟到機構受訓,希望提升能力,溝通方式都唔同咗。

彭飛舟舉例,現時年輕醫生除咗每星期5天工作,仲要利用假期接受專科培訓。佢近日就聽到有啲不滿聲音,例如有個已畢業一兩年嘅醫生,不滿受訓令佢無時間休息,向任職跨國公司人力資源部高層嘅媽媽投訴,最後醫生媽媽寫信畀醫院嘅上司,質疑醫院有無違反勞工條例,令彭飛舟發覺「呢一輩嘅supervisor(上司)要處理埋阿媽」。不過,佢覺得年輕醫生嘅意見,都可以令管理層喺設計課程時,考慮可否改為半日制,作出平衡。

彭飛舟形容,依家係「兩代接洽嘅時間」,所以醫管局都要與時並進,培訓中、高層醫生用「modern(現代化)處理手法」同年輕醫生溝通,例如團隊培訓,加強面對面溝通,「喺部門會議除咗鬧人之外,都要家常嘅嘢」。佢又話,未來會進行調查,探討約20歲至30歲嘅年輕醫生係鍾意用咩途徑溝通。

其他報道:天文台料今冬偏高溫多雨 明年推大灣區天氣預報

其他報道:美國廚師腸掀搶購潮 大昌行:努力確保供應不受影響

相關字詞﹕醫管局 醫生

上 / 下一篇新聞