港聞

下一篇
上一篇

【Emily Online】陳凱欣明宣誓今綵排 喜獲鄭松泰移位 可與建制派一起坐 (17:01)

喺九龍西立法會補選以10.6萬票當選嘅建制派陳凱欣,聽日就會喺立法會大會上宣誓,佢今日返咗立法會綵排。而家立法會會議廳入面,可以坐嘅空位唔多,本身陳凱欣要坐喺熱血公民鄭松泰嘅右手邊,即係青年新政梁頌恆被DQ(取消議員資格)前嘅位置。陳凱欣同Emily講,鄭松泰好好咁願意向右移過一個位,所以佢可以坐喺體育、演藝、文化及出版界立法會議員馬逢國隔籬,而右手邊就係鄭松泰。換言之,陳凱欣可以同建制派一齊坐,有個照應。陳凱欣話,呢個座位無咁尷尬,因為如果第日鄭松泰同民主派有咩行動都唔使隔住佢。

相關報道:林鄭:政治板塊改變對施政無大影響 指最重視公平公正誠實選舉

辦公室方面,佢已經揀好咗喺6樓嘅辦公室,與民建聯鄭泳舜同獨立嘅何君堯為鄰,不過由於間房仲要整番啲間隔,呢十幾日要用住10樓嘅1019室。1019室曾經係前立法會議員、社民連梁國雄嘅辦事處,而家嗰層仲有社福界邵家臻。陳凱欣就話嗰層仲有工聯會,佢個臨時office喺邊邊位,即使同一層有民主派都唔會有所謂,亦都相信無咩問題發生。

講番聽日個宣誓,陳凱欣話佢揀咗無宗教形式嘅宣誓,今日返咗立法會綵排。佢話,呢排拉票搞到把聲仲係好沙,希望聽日宣誓嗰陣唔會咳。佢強調自己會嚴肅莊重咁宣誓,唔會喺誓辭中加入任何嘢。

補選期間,陳凱欣都係一身運動裝出現,佢話喺立法會會著番斯文look,聽日宣誓未諗好著咩衫,今晚要返屋企揀同燙。

至於作為新丁議員,聽日第一日開會會唔會喺會議廳坐足全日,佢就話全日都會喺立法會大樓,如果見佢喺會議廳行開咗,應該係有啲立法會行政事務處理。

民建聯主席李慧琼(Starry)今朝喺電台節目話民建聯歡迎陳凱欣加入,陳凱欣同Emily重申,佢暫時唔會加入任何政黨,但多謝Starry嘅支持。

相關報道:

李卓人兩字形容馮檢基 稱不想再講馮

李卓人指有負面包袱 嘆議題被扭曲 逐點反駁

李慧琼:民建聯隨時歡迎陳凱欣加入

相關字詞﹕九龍西補選 九西補選 陳凱欣 編輯推介

上 / 下一篇新聞