港聞

下一篇
上一篇

【Emily Online.短片】民建聯籌款晚會 譚志源戴假髮同高永文蘇錦樑跳K-POP (21:23)

民建聯兩年一度嘅籌款晚會今晚喺灣仔會展舉行,主題係「全賴有您」,主席李慧琼致辭時話,有朋友同佢講,今日其實都係投票日,因為支持民建聯,所以會投下「鈔票」。佢話兩年前已定今次晚宴日期,同補選接住係「完美巧合」,形容陳凱欣當選因為大家,令立法會增添多一份力量,笑言希望大家心情暢快,大家繼續「投票」支持民建聯。

晚會其中一個高潮係三個前局長高永文、譚志源同蘇錦樑3人大跳K POP,譚志源戴假髮表演,蘇錦樑同Emily講,幾乎唔認得對方。Emily都估唔到佢哋都跳得有板有眼,跳得起勁之時仲將外套扔落台,而一眾嘉賓亦睇得好高興,前特首梁振英舉起手機影相,特首林鄭月娥亦睇到拍晒手掌。

而民建聯主席李慧琼則獨唱《中國夢》,副主席張國鈞同周浩鼎合唱《壯志驕陽》,中聯辦副主任何靖同前人大代表張明敏亦合唱《我的中國心》,幾個表演環節都為民記籌得數以百萬。

兩年前民記一晚籌得7600萬,當時單係時任中聯辦主任張曉明捐贈寫上「度德而處」嘅書法,就已為該黨籌得1880萬元。今年中聯辦主任王志民無再寫字畀民記籌款,噚晚亦無出席晚會、但張曉明就非常念舊,其中一樣拍賣品係「不忘初心 牢記使命」郵票珍藏冊,上面有張曉明親筆題詞,寫上「中國夢裡有香港同胞的事業夢、家庭夢、幸福夢」,底價50萬元。今次就以220萬賣出。

而已故國學大師饒宗頤寫嘅墨寶「量寬福厚」,則由全國政協常委許榮茂以1000萬元奪得。

其他報道:【佔中9人案開審】時任指揮官稱別無選擇放催淚彈 相信不會煽動人佔領金鐘

其他報道:【紅磡站調查聆訊】禮頓工程師指3次揭發剪鋼筋 惟上司知悉無要求加強監管

其他報道:【高鐵】內地地震警報 西九往廈門深圳2列車將延遲開出

相關字詞﹕emily online 民建聯 晚會 籌款 張曉明 編輯推介

上 / 下一篇新聞