港聞

下一篇
上一篇

【Emily Online】陳凱欣偕王祖藍聽初創青年分享 維港見「請支持」霓虹燈飾 (22:32)

立法會九龍西補選星期日(25日)就舉行,陳凱欣今日就同埋藝人兼廣西政協王祖藍,一齊去聽科創同初創青年分享,同場仲有民建聯嘅九龍西立法會議員鄭泳舜。

陳凱欣係facebook話,「忙碌的選舉期仍同祖藍一齊去聆聽科創、初創青年的簡介及心聲」,仲話任何時候都有新的挑戰,同時亦有新機遇,「只要用心、用人,便可成就一番事業」。

另一方面,雖則陳凱欣多次話自己選情嚴峻,不過睇嚟佢背後仍然有好多雄厚力量支持。今晚網傳,喺維港璀璨嘅燈飾之中,由港島眺望紅磡祥祺中心方向,可以見到「請支持陳凱欣」嘅巨型霓虹燈飾,令Emily憶起當日仍然身為「健康大使」嘅陳凱欣,喺紅磡多間殯儀館後嗰幅巨型海報。唔知道今次喺有人別有用心,定係不謀而合呢?

除此之外,九龍一份地區報《龍週》,亦用陳凱欣選情嚴峻為今日頭版,內文仲話遭到對手團隊抹黑滋擾,又叫大家全家總動員一票都不能少。翻查資料,呢份《龍週》背後4名董事等負責人,有至少兩個係同鄉會同工商總會之類啲建制背景。睇嚟陳凱欣嘅支持者,喺選舉最後階段,都默默地用唔同嘅手法為佢加持。

補充番,今次補選其他候選人有伍廸希、曾麗文、李卓人同馮檢基。

其他報道:【Emily Online.多圖】30議員接種流感針 陳肇始:應登記埋器官捐贈

其他報道:羅智光:韓正提點香港公務員 處事要「有智慧、有勇氣、以民為本」

其他報道:基本法委員會委員劉迺強去世 友指患癌多年:既突然又不突然

 

相關字詞﹕陳凱欣 王祖藍 龍週 霓虹燈傭 九龍西補選 編輯推介

上 / 下一篇新聞