港聞

下一篇
上一篇

【Emily Online】聶德權學「汪阿姐式」tag人 宣揚關注精神健康 (21:03)

「汪阿姐」汪明荃近日喺Instagram自創「汪阿tag」新式tag人(標籤)方式,直接手寫紅色大字人名喺張相上面,就當係已經tag咗人,吸引唔少藝人仿傚。估唔到連政制及內地事務局長聶德權,今日喺facebook發帖時都緊貼潮流,用呢種tag人新方法,宣揚關注精神健康。

聶德權話佢早幾日擔任香港神託會「蕉夫@大埔」活動主禮嘉賓,巧遇佢8年前以社會福利署長身分,探訪神託會沙田精神健康中心「創薈坊」時接待佢嘅男士Alan。佢喺fb放咗當年同今次活動時同Alan嘅合照,跟住就學汪阿姐咁,用紅色字喺相上面寫低「我」同「Alan」,帖文又叫大家可以去佢IG睇更多相。

其實汪明荃「發明」咗紅字tag人之後,唔少藝人好似張敬軒、麥明詩等,都爭相模仿呢個新潮流,連譚小環嘅魚蛋店都喺fb用呢個方法嚟tag佢哋嘅小食。汪阿姐見到咁多人學佢,似乎都好高興,今日再喺IG出post時,仲特登留言話「#我就是ig紅人 #潮流」。

相關報道:【網民爭住學】IG相直接寫名當tag人 汪明荃自誇IG紅人 

其他報道:退休攝影師覆核勝訴 政府關閉「公民廣場」被裁違憲

相關字詞﹕emily online 聶德權 政制及內地事務局 汪明荃 汪阿姐 汪阿tag 編輯推介

上 / 下一篇新聞