港聞

【Emily Online:山竹過後】陳茂波隨紀律部隊義工清塌樹 望「沒嫌棄我手腳慢」 (18:04)

超強颱風「山竹」今個月16日(上星期日)吹襲香港,期間淨係計康文署轄下場地,已經冧咗大約1.7萬棵樹。風災至今13天,財政司長陳茂波喺facebook話,自己今日聯同紀律部隊義工隊,去上水區清理塌樹。

其實風災之後,除咗政府前線人員忙住清理擋路嘅塌樹斷枝外,唔少市民亦自發清理屋企附近嘅樹木同垃圾,兩個星期以來,已令好多地方漸漸還原成打風前嘅面貌。有義工更特登去到離島等較偏僻的地區,幫居民清理地方。

陳茂波今日就喺fb話,「非常感激」各政府部門嘅人員連日加緊清理市面,佢「作為香港一份子,好應(該)同出一分力」,所以今日都跟紀律部隊義工隊「一同出動」清樹,話大家「綿力雖小,團結乃大」,仲打晒開口牌,講明希望義工「沒嫌棄我手腳慢」。

其實除咗陳茂波之外,漁護署今日都同香港潛水總會合作,舉辦海岸清潔日,義工除清理西貢橋咀洲附近海牀嘅棄置魚具外,亦都清理咗因「山竹」而被沖上海灘嘅海洋垃圾。海牀海灘夾埋,佢哋今日就清走咗95公斤垃圾。

相關報道:漁護署與潛水總會義工海岸清潔日 西貢橋咀洲檢約近百公斤垃圾

相關報道:【Emily Online】港鐵劉天成:高鐵原於山竹襲港前一日通車 形容推遲日期是「上天眷顧」

相關字詞﹕山竹 塌樹 陳茂波 編輯推介

上 / 下一篇新聞