港聞

【Emily Online】梁錦松語出驚人話林鄭「唔係人」 (14:34)

惜食堂今日舉行「惜食飯餐感謝宴2018」,邀請咗特首林鄭月娥、支持機構同捐贈伙伴齊齊品嘗由惜食堂製作嘅飯餐,林太喺活動前仲參觀咗惜食堂中央廚房、社區中心。惜食堂主席梁錦松喺活動致辭時一開始就話,好多人問佢識咗林太咁耐,林太究竟係咩人,佢語出驚人咁話「佢唔係人嚟㗎!」之後解釋話因為林太嘅日程密到「唔係人做到」,「有朋友夜晚12點收到佢WhatsApp」。佢話,林太為香港勞心勞力,特別係最近香港嘅土地問題,叫大家支持林太,提供更多土地,因為香港樓價實在太貴,仲叫大家畀啲掌聲林太。

點解由「惜食」講到土地?阿松話,希望社會停止浪費,惜食堂提供嘅不止飯餐,亦想受惠人士感受到有愛,而香港最缺乏愛,「愛可解決好多紛爭,包括土地問題」。

林太之後上台致辭就冇回應梁錦松話佢「唔係人」,亦都冇講土地問題,而係聚焦講番惜食堂嘅工作。佢話,2014年8月出席咗同一聚會,4年間都有留意惜食堂發展,知道惜食堂不斷拓展服務;佢希望,非政府機構可以展示創新創意,提供唔同功能,而惜食堂除咗提供食物畀有需要人士外,而家有教育中心,教小朋友唔好浪費,亦有社區中心令長者感到有愛。

林太又感慨,香港係富裕社會、美食天堂,但每日都有食物大量浪費,希望在座嘅參加者食飯時都心存感謝、心存感恩。佢讚揚每一個義工都係天使,亦感謝惜食堂為香港做嘅工作。

而家惜食堂兩間中央廚房每日生產8000份熱飯餐及1000份食物包,梁錦松話,希望將來可將生產量增加1倍以上,用環保、扶貧同教育,令香港成為更好嘅地方,佢又感謝所有捐贈者、食物提供者同200名義工。

其他報道:【Emily Online】科大冰川社雞翼門 大嘥鬼出帖籲珍惜食物

其他報道:【土地大辯論】何喜華稱「反對發展高球場」 社區組織協會澄清:意指反對任何高爾夫球場存在

其他報道:梁振英控誹謗 鍾劍華自言仍然「很有火」不做「鵪鶉」

相關字詞﹕惜食堂 環保 林鄭月娥 梁錦松 編輯推介

上 / 下一篇新聞