港聞

【Emily Online】健康大使曝光頻 陳凱欣推潮汕文化 (22:31)

盛傳代表建制派參戰立法會九龍西補選,九龍社團聯會「健康大使」陳凱欣,近期頻頻曝光。佢活躍範疇唔止同健康有關,潮汕文化亦關佢事。九龍西潮人聯會等社團,下月22日喺深水埗合辦「潮汕文化巡禮」,到時陳凱欣亦會現身。聯會會長潘陳愛菁強調,活動同選舉無關,只係認為陳凱欣形象健康,先邀請對方出席。

文化巡禮會舉辦美食活動、潮劇表演同猜證謎等。聯會星期四(30日)公布活動細節,請嚟食衛局前局長高永文露兩手,示範整潮式月餅同沖潮州茶。雖然高醫生只係將師傅預先整定嘅餅皮簡單咁包住餡料,但師傳都讚佢手勢正宗。下個月中秋節,高醫生話最鍾意食紅豆餡月餅,但為健康着想,會控制食量。

聯會後日會喺九龍西搞巴士巡遊宣傳活動。潘會長話,暫未知陳凱欣會否出席。高永文就同Emily講,陳凱欣仲考慮緊係咪參選。潮汕文化巡禮兩個月後就係補選日。無獨有偶,聯會去年12月都舉辦九龍西潮汕文化節,當時正正搵嚟3個月後參選立法會補選嘅民建聯鄭泳舜擔任文化大使。

其他報道:【Emily Online】科大冰川社雞翼門 大嘥鬼出帖籲珍惜食物

其他報道:【土地大辯論】何喜華稱「反對發展高球場」 社區組織協會澄清:意指反對任何高爾夫球場存在

其他報道:一地兩檢條例明刊憲 9月4日實施

相關字詞﹕九龍西補選 補選 立法會補選 編輯推介

上 / 下一篇新聞