港聞

【Emily Online】「鼠戰中環」周日出擊 周浩鼎麥美娟鄺俊宇齊揀戰衣 (19:30)

置地舉辦「鼠戰中環2018」將於周日(26日)舉行,今年繼續邀請議員同傳媒組隊參加接力賽。立法會議員民建聯周浩鼎(Holden)、工聯會麥美娟(Alice)同民主黨鄺俊宇(Roy)齊齊參賽,佢哋今日就特登為鼠戰去揀創意服飾。

其他報道:梁振英入稟高院控鍾劍華及《立場新聞》誹謗 立場總編籲「勿試圖逼使傳媒噤聲」

Holden話,佢個仔鍾意蝙蝠俠,所以一早已經揀好要扮蝙蝠俠,個仔亦鍾意「閃電王麥坤」,但佢直言要扮架車實在有難度。其實Holden要做最後一棒,到時都要「駕駛」芝士車衝線㗎喎!

Alice就話姪女鍾意扮電影《冰雪奇緣》入面個Elsa公主,所以要佢扮Elsa個妹Anna。不過舖頭冇呢件戲服,最後Alice就揀咗件佢形容係「大媽look」嘅50年代家庭主婦造型戲服。基本上件衫就係一件圍裙同頭箍,佢解釋因為跑步要方便、透風。

Roy就遲咗少少上去服飾舖,見到Holden同Alice揀好衫,笑言「咁似立法會開會建制派數夠票就得」,突然間舖變咗議事堂;Alice反擊話「咁似立法會遲到嘅」。Roy話重要嘅票會投,仲趁機呼籲建制派查沉降、引用特權法嘅動議唔好走咗去。

一陣唇槍舌劍後,Roy揀咗件簡簡單單嘅民族服飾。佢話到時自己做第一棒,真係會跑,所以想著短褲,冇披風加透風,擔心Holden天氣咁熱要扮蝙蝠俠會唔會辛苦。Holden話,佢哋參加嘅接力賽只係20分鐘內完成:「熱都唔係咁大concern,我個仔鍾意,點都『鼎』硬上啦!」佢仲同阿Roy講,你結婚生仔之後就明白,點知Roy竟然話「好快」,之後就補番句即係「遲早都會」嘅意思。

「鼠戰中環」由2006年起,為推廣精神健康嘅機構「思健」籌款,每年都喺香港嘅核心地帶中環舉行,參加者需穿上行政人員裝束或創意服飾、腳踏跑鞋,喺賽事沿途克服8個不同障礙,並以公事包代替接力棒,直奔終點,以透視商業社會中可能面對嘅不同挑戰。

其他報道:電腦節開鑼 學生哥排隊5日為買平貨 媽媽每天送飯

其他報道:多區「擔櫈仔排頭位」購劉德華個唱門票 大埔排頭位女士答錯開騷日期

相關字詞﹕鼠戰中環 周浩鼎 麥美娟 鄺俊宇 編輯推介

上 / 下一篇新聞