港聞

【短片:Emily Online】海洋公園哈囉喂有得玩VR Sanrio卡通人物加盟 (17:39)

「海洋公園哈囉喂全日祭2018」,10月5日就正式開放入場。園方同Emily講,今年佢哋引入咗不少高科技元素,包括增設多媒體互動鬼屋,同升級版虛擬實境機動遊戲等等。對上年海洋公園鬼屋內有人意外死亡,園方形容事件「不幸」,又強調佢哋一直重視所有遊戲設施安全,更期望今年啲新元素,可以將驚嚇升級,帶來「超感官體驗」。

公園管理及演藝節目執行總監吳守堅介紹今年海洋公園「哈囉喂」景點,特別向Emily推介「極級驚慌鬼域」系列嘅「屍營醫院」,遊人會獲配備一個探測電筒,深入荒廢醫院,「你想佢着,佢就唔着」,務求大家有驚險刺激嘅體驗。今年亦會有一眾Sanrio卡通人物「強勢加盟」,到時喺遊樂徑同小朋友玩「trick or treat」、做任務,稱得上「合家歡環節」。

Emily睇完海洋公園前主席盛智文扮鬼嘅「屍營醫院」宣傳片,都嚇咗一跳。業務拓展及教育執行總監李玲凰就話,新元素加上高鐵開通,希望今年會破百萬入場人次,又話Sanrio卡通人物大人小朋友都鍾意,可以吸引不少「家庭客」。Hello Kitty仲約Emily到時一齊入去玩,今年哈囉喂門票根據日間門票定價,成人票價為港幣480元,小童(3至11歲)票價則為240元。

公眾人士可以於10月5日至31日其間的16個指定日子入場,如果希望升級門票,可以港幣860元購買成人或430元購買小童哈囉喂優越門票,能夠無限次優先參觀指定「哈囉喂景點」以及享有部分景點的特快通行證。9月中開始部分指定日子則會供企業包場進行活動。

其他報道:何漢權批港獨對不起歷史、先民 指中國在地球存在彌足珍貴 兩地血濃於水

其他報道:梁振英女兒與行李毋須「同行同檢」 港龍機艙服務員司法覆核勝訴

其他報道:【副教授涉殺妻女案】法醫指許金山妻子體內有抗抑鬱藥 解說次女死因報告前被告哭泣

相關字詞﹕海洋公園 哈囉喂 鬼屋 編輯推介

上 / 下一篇新聞