港聞

【短片:Emily Online】聶德權邊跑步邊回顧過去一年工作 (18:00)

特首林鄭月娥同佢嘅班子上任滿一周年,之前有消息話林太要求各司局長拍短片,講述過去一年嘅政績。政制及內地事務局長聶德權今日就喺個人fb專頁上載短片,回顧一年嚟嘅工作。 

3分半鐘短片題為〈回望向前同行〉,局長一身運動造型,喺海濱長廊跑步,之後就剪輯咗過去一年,局長出席唔同活動嘅片段。首先回顧佢喺剛獲委任做局長嘅講話,局長當時話會「用心以誠,服務市民,貢獻香港」。

之後就係同立法會議員一齊去粵港澳大灣區考察。局長話透過實地考察,大家會更深刻認識同了解大灣區。

短片亦提到國歌法立法,局長講到「國歌法立法唔係洪水猛獸,係履行憲制責任」,又話國歌係國家嘅象徵同標誌,應該予以尊重。

除咗政制工作,局長都關心唔同社群,包括少數族裔、性小眾等等,片段入面佢走訪多個非政府組織,了解佢哋嘅需要。

最後局長就去咗坪石邨,佢喺嗰到生活咗近廿年,話返到去覺得好開心,喺坪石邨有好多童年回憶。佢都講到希望政府提供更多公共房屋,俾基層家庭一個安居樂業嘅地方。

其他報道:黃錦星:填海應避免生態敏感地 有環評機制減少環境影響

其他報道:聲稱放售黃子華棟篤笑門票 青年疑騙約15萬元被捕

其他報道:【短片】當兵工作繁重欠妻子求婚儀式 駐港解放軍助隊員展現「遲到的愛」 

相關字詞﹕聶德權 編輯推介

上 / 下一篇新聞