港聞

【短片:Emily Online】青年讚願意花時間落區 劉江華:慣咗每日都係咁跑 (13:02)

民政事務局喺fb出咗條「與劉華局長同行」嘅4分鐘短片,講局長劉江華日前帶着「自薦計劃」青年委員Tiger同Alex工作。Alex事後大讚局長願意花時間落區,了解唔同市民嘅需要。

劉江華嗰日安排咗好多行程,先喺民政局辦公室開小型早禱會,再到立法會同議員開會,商討發展體育基金同埋非物質文化遺產及博物館的撥款,再由中西區專員帶到海濱長廊同青年及藝術表演者交流,然後到士美菲路街市睇吓有咩改善,其間局長好親切咁問街坊:「如果(電梯)壞咗咁點?」街坊就答話:「如果壞咗,我哋就行(樓梯)上去,好辛苦,好高呀。」

之後劉江華到聖士提反堂中學去參觀體育堂,仲即席表演射籃,一擊即中。一行人之後趕至故宮文化博物館,局長戴着金頭盔、手執金剷,參與文化博物館嘅動土儀式。

局長仲帶Tiger同Alex去賽馬會創意藝術中心,探訪古琴藝術傳人蔡昌壽,一研斲琴文化,不過其中有一幕好奇怪,畫面上明明係局長同蔡昌壽師傅傾談,但聲音卻是工作人員講笑話:「香港講琴譜就係 笑傲江湖。」唔知係剪片嗰陣「剪錯聲」,定還是係特登呢?

最後,劉江華就同兩位後生仔返到禮賓府,結束一日行程。劉江華在片中同Alex講:「成個香港向前行,就要每一個部門、每個環節都要行到。所以大家睇到,我哋每個司局長其實都好努力。」

Tiger關心咁問局長攰唔攰,劉江華答佢已經習慣咗,無諗到攰依樣嘢,慣咗每日都係咁跑。

其他報道:黃雨警告生效

其他報道:天文台:短期內廣泛地區或有大雨 籲提高警覺

其他報道:【網上熱話】搭的士無帶銀包 晚上轉帳找數 乘客司機互讚善良誠實

相關字詞﹕劉江華 編輯推介

上 / 下一篇新聞