港聞

【Emily Online】諷刺利物浦門將 小米廣告辣着球迷捱轟 (21:22)

相信唔少有睇星期日(27日)凌晨歐聯決賽球迷,都會對利物浦門將卡利奧斯嘅「災難級演出」記憶猶新。而喺今日,小米香港官方fb專頁就以呢個話題出帖,試圖吸引一眾「米粉」購買行李箱,卻估唔到帖文會被利物浦球迷群起轟之,釀成「關公災難」,迫使小米小編刪帖道歉。

據網上流傳帖文截圖所示,小米小編對卡利奧斯評價十分負面:「相信如果有睇前晚歐聯嘅米粉(利迷),一定好想送個旅行箱畀門將卡利奧斯。你值得更好嘅球隊,求你快啲喇……」另外小米小編喺形容佢自家品牌嘅行李箱時,就話係「堅固過龍門」,明顯諷刺卡利奧斯。

帖文一出,引起不少球迷,尤其係利物浦球迷不滿,紛紛喺帖文下方留言,批評小米將所有利物浦球迷看成無情無義。更有身兼「米粉」嘅球迷親自私訊小米facebook編輯,聲言以後罷買小米產品。而小米方面回覆時,承認決定輕率,向廣大球迷致歉。

其他報道:女童玩波波池遭螺絲弄傷 DREAM ROOM稱已與家長達成和解

其他報道:西九故宮館今動土 林鄭月娥:雨過天青

其他報道:披露廉署查馮程淑儀 吳文遠判監4個月 准保釋等候上訴

相關字詞﹕利物浦 卡利奧斯 歐聯 小米

上 / 下一篇新聞