港聞

【Emily Online】無內地居民身分證 人大代表譚志源開唔成上海銀行戶口 (21:02)

大灣區規劃就快推出,外界關注,呢份規劃會唔會推出,便利港人喺大灣區生活嘅措施。其實,𠵱家港人喺內地生活會遇到唔少問題,例如開銀行戶口就好困難,連身兼港區人大嘅譚志源,都遇到呢個難題。

其他報道:調查:76%中學生領袖認少參與公共事務 特朗普梁振英成最不喜歡政治人物

一國兩制青年論壇今日搞咗個「大灣區研究發展基金」啟動儀式,政制及內地事務局前局長譚志源致辭時話,佢做局長嗰時有參與大灣區規劃,所以特別有感情。佢承認原本大灣區規劃會早啲推出,但佢覺得遲咗都好,相信係代表中央有聽香港嘅意見,第日個規劃會有更多、更具體嘅措施。 

譚志源又主動用自己做例子,講下香港人喺內地有咩困難,話說佢之前想去上海開銀行戶口,但銀行職員要佢提供上海工作證。好彩譚志源離職後加入咗前財政司長梁錦松嘅公司,推動內地醫療業務,所以佢同銀行職員講,話自己公司喺四川開醫院,銀行職員雖然豁免咗上海工作證嘅要求,但堅持要佢提供內地居民身分證,唔肯收回鄉證。

擾攘咗一個上晝,譚志源最終都開唔成上海銀行戶口。連人大代表都開唔到銀行戶口,政府經常鼓勵小市民北上發展,睇嚟都要先同內地爭取多啲便利措施先得。

其他報道:高鐵車輪磨損 港鐵稱屬正常符要求 工程師籲披露數據釋疑慮

其他報道:高鐵試運屢被揭問題 馬時亨:「我哋話你知OK,就得架啦」 披露更多資料無意思

相關字詞﹕大灣區 人大代表 譚志源 銀行戶口 身分證 回鄉證

上 / 下一篇新聞