港聞

【Emily Online】馬逢國遭定型啫喱膏出帖「抽水」:30g可以帶上飛機 (17:35)

立法會體育、演藝、文化及出版界議員馬逢國,被踢爆日前喺機場離港時懷疑「撻朵」,結果可以帶到一支違規嘅髮型啫喱上機,涉事職員就俾機場保安公司紀律調查。事件繼續成為城中話題,最新就係定型啫喱膏品牌GASTBY,星期五(25日)下晝喺香港嘅一個fb post。

呢個post一開始就話,「去旅行都想帶支定型啫喱膏gel番個靚頭,但擔心帶住太大支gel唔方便?」然後就話買佢哋嘅定型啫喱膏(特硬/濕硬),就會附送一支30克輕便裝,「細細支咁方便,想帶去邊都得啦!」之後仲有hashtag「#30g可以帶上飛機」。

呢個post出咗兩個鐘度,已經有超過700個share同2700個emoji,其中就包括公民黨立法會議員楊岳橋。

查實,講到「抽水」,噚晚已經先有自由黨榮譽主席田北俊,喺fb借分享敝報即時新聞一則相關報道,然後留言一句:「學(前保安局長)葉劉(淑儀)捍衛自己個髮型呀?」之後仲hashtag「#咁邊個捍衛航空安全?」、「#議員有特權?」、「#搞到我想做返議員」,以至「#我唔用gel」。

不過,另一方面,都有人相當嚴肅看待事件。香港空勤人員總工會就發表聲明,形容馬逢國呢單嘢,嚴重程度相當於2016年涉及時任特首梁振英,同佢夫人唐青儀以至佢哋個女梁頌昕嘅「行李門事件」,「再次突顯權貴利用個人公權力挑戰機場保安人員的專業」,「而離譜的是在事件被揭發後,馬議員託辭大家對有關規定有不同理解,藉此為自己開脫,雖然馬議員最終在壓力下道歉,但其『失格』行為實在是不孚眾望!」

工會重申,「事實上,有關規定是因應國際恐怖主義肆虐而採取的安檢措施,目的是保障乘客及航空人員的人身安全」,機管局必須畀前線人員更清晰同明確指示,嚟阻止呢類事件重演。高院亦會喺下個月20號,處理工會就「行李門事件」提出嘅相關司法覆核案。

相關報道:

否認「撻朵」違規帶髮型啫喱上機 馬逢國認誤解機管局規定 願向機場職員講不好意思

其他報道:馬逢國獲准攜違規髮型啫喱上機 機場保安公司:已展開紀律調查

其他報道:馬逢國被指「撻朵」帶超容量規定髮型啫喱上機 譚文豪:馬帶頭違法應致歉

相關字詞﹕馬逢國 田北俊 抽水 編輯推介

上 / 下一篇新聞